政事
昨日立法會財務委員會搞到一鑊屎，主席吳亮星責任難逃，佢今早佢電台解話，亦聽唔出有乜新意。
昨日的財委會會議可以用「大混亂」嚟形容，今日有人提起新民黨的葉劉同田北辰可能投錯票。事緣會上就規程問題拗咗一大餐後，民協馮檢基提出休會議案，但吳亮星又就這個議案是否容許議員發言爭論咗一輪，最後吳亮星自己提出表決是否將就此議案的發言時間限於1分鐘，但投完票之後，吳亮星知道出咗事，唔肯公布投票結果，搞到大批泛民議員即衝向吳亮星面前抗議。
原來呢個限制議員發言時間的議案，竟以24票贊成、26票反對遭否決，搞到吳亮星不知所措。後來懷疑是新民黨的葉劉及田二少投了反對票，出現疑似「投錯票」事件。
不過其他議員對新民黨可能投錯票寄予無限同情，話即使佢地投錯，都完全唔可以怪佢地，因為過程實在太混亂，太失控，搞到大家唔知投緊乜，都未曾見過有人主持會議可以衰到咁，矛頭都係指住吳亮星。
有議員作此結論:愚蠢是原罪。
Ariel
** 博客文章文責自負,不代表本公司立場 **
又到星期五開立法會財委會，警方、立法會行政管理委員會嚴陣以待，結果係外面氣氛熱鬧，會場內亦唔執輸。
據聞建制派預咗今日財委會會剪布，早早已Call齊人，部署好晒等剪完布就表決，亦預咗泛民係咁圍繞程序玩，玩到主席星爺(吳亮星)氹氹轉架啦，不過希望硬著頭皮捱過佢啦。
建制派對財委會主席星爺有啲擔心，但就冇諗過會滴汗到咁樣的程度。星爺不停咁自制漏洞俾人攻擊，俾人講一分鐘定一加N分鐘都搞唔掂，直頭係慘不忍睹。最後被人不斷質疑，草草收場，剪布不成，笑話成籮。
散會後建制派唔少議員成肚氣，好似葉劉咁出到嚟就直指不如請卿姐主持算啦。其實呢啲都係情緒式的發洩，建制派的人都心知肚明，打緊仗時搵個泛民主持財委會會議，都唔係一個符合政治現實的想法，但俾星爺的表現，就算依家再計劃下星期剪布，都唔知佢搞唔得掂。
政府中人對呢個結果亦都冇眼睇，唯有係交個波俾立法會，強調呢個議會程序、立法會運作的問題，要政府收番新界東北撥款申請，或者重新排其他議程先上，都係不可能，此例一開，以後有爭議的議題都係嘈一下就收，好難搞。總之有一大推其他撥款申請排曬喺度，各局長亦都講咗七月休會前過唔到林林總總撥款的後果。立法會點樣審議，幾時通過，過唔到有咩後果，就要議員自己要衝量啦。
