自由行凍過水

佔中運動搞公投搞到興烚烚之際，突然傳來商務及經濟發展局局長蘇錦樑傍晚飛北京、明日與國務院港澳辦官員開會的消息。蘇局長旗下最直接同中央有關的事務，就係自由行，佢上去都應該同減自由行有關。

特首CY之前放風話可能減兩成，聽官場中人講，其實特首想叫商界反對吓，希望中央回心轉意，知道香港經濟唔係咁好，唔好減自由行。後來聽消息，話可能7月中有定論。

但臨時召蘇局長上去，睇嚟情勢又變。近期香港立立亂，減自由行呢家嘢唔係急得咁緊要，點解臨時臨急要召蘇局長上去搞呢?

唔好怪Ariel多心，我擔心減自由行同佔中嘢有關。正當泛民好高興話公投人數咁多，如果過百萬會唔會換埋特首之際，其實阿爺的邏輯剛好相反，你搞得愈勁，我企得愈硬，我咪減吓自由行囉，仲要加快啲減呀。若然係咁，真係無眼睇囉。

有消息話，政府數字若只減針對水貨客的「一簽多行」，只佔自由行總人數3%，無乜用。可能除了控制水貨客之外，還有其他本來有一年一簽無限行的旅客，都變作指定數目的一簽幾行，以控制來港人數，最後減5%以上都唔奇啦。

Ariel

** 博客文章文責自負,不代表本公司立場 **

昨日立法會財務委員會搞到一鑊屎，主席吳亮星責任難逃，佢今早佢電台解話，亦聽唔出有乜新意。

昨日的財委會會議可以用「大混亂」嚟形容，今日有人提起新民黨的葉劉同田北辰可能投錯票。事緣會上就規程問題拗咗一大餐後，民協馮檢基提出休會議案，但吳亮星又就這個議案是否容許議員發言爭論咗一輪，最後吳亮星自己提出表決是否將就此議案的發言時間限於1分鐘，但投完票之後，吳亮星知道出咗事，唔肯公布投票結果，搞到大批泛民議員即衝向吳亮星面前抗議。

原來呢個限制議員發言時間的議案，竟以24票贊成、26票反對遭否決，搞到吳亮星不知所措。後來懷疑是新民黨的葉劉及田二少投了反對票，出現疑似「投錯票」事件。

不過其他議員對新民黨可能投錯票寄予無限同情，話即使佢地投錯，都完全唔可以怪佢地，因為過程實在太混亂，太失控，搞到大家唔知投緊乜，都未曾見過有人主持會議可以衰到咁，矛頭都係指住吳亮星。

有議員作此結論:愚蠢是原罪。