內地官媒《環球時報》連續兩日發炮，尋日嗰篇提到「佔中」，話無論有幾多人投票，都唔及全國13億人多。特首梁振英今早開行政會議前，罕有咁主動回應，話唔同意《環時》所講，認為唔應該將香港市民同全國人民對立起來。
CY呢番談話，隨即引起政圈注意，係咪中央政策有變？阿爺唔想再同泛民「硬碰硬」，態度軟化？
Ariel搵政壇高人索索料，佢話中央政策無變，只係唔想喺風頭火勢時，再添煩添亂啫。
《環時》雖然係官媒，但言論取向一向較出位，形容佢做「非正統官媒」可能啱啲。高人話《環時》今次連珠發炮，分分鐘推高佔中公投投票率，甚至推升下星期二的七一遊行參與人數。CY即刻出嚟，就係要為呢篇惹火社評降溫！
高人話，呢啲係「策略性」降溫招數，唔希望激起民憤，但亦唔代表阿爺同泛民過招時以後唔再「硬碰硬」，放軟手腳喎！
仲有一點值得留意，CY鬧《環時》的同時，又寫信俾台灣《自由時報》，反駁有關一國兩制白皮書的評論，話文章對白皮書嚴重誤解。CY今次「左右開弓」，都算少見囉。
Ariel
** 博客文章文責自負,不代表本公司立場 **
