政事
「佔領中環」全民投票結束，有78.8萬人投票。真普聯方案獲最高票數，得票率超過四成，而棄權的只有8.9%。佔中發起人戴耀廷今早在電台話，由於三個方案都有公民提名成份，佔了投票人的91%，中央要正視。
中央唔等戴耀廷講都出咗招，《人民日報海外版》發表評論文章，指香港有人與外國演雙簧，搞亂香港個局，篇文題為「祖國的戰略定力是香港之福」，內文直指「美英等國一邊承認香港在一國兩制下取得的成就，期望從香港的發展中獲得經貿實利，一邊又禁不住干預香港事務的誘惑，寄希望於把香港打造成牽制中國的橋頭堡。港內極少數人則花樣翻新地在香港製造政治麻煩，時而“占中”，時而“公投”，與外部勢力形成干擾破壞一國兩制在港實施的“雙簧戲”，損害香港的繁榮穩定。」
呢篇文特別之處第一是點名「美英等國」，過去阿爺鬧呢啲國家都只係講外國勢力，今次係開名啦。第二是直指搞「佔中」者同外國勢力「唱雙簧」，比較不客氣了。
聞說阿爺對公投極之氣憤，質疑呢啲網上投票有幾成真，當中有幾多是未成年人士去投。佢谷住道氣，就由《人民日報海外版》先發吓炮。
Ariel
** 博客文章文責自負,不代表本公司立場 **
立法會財委會終於通過新界東北前期撥款，由於財委會主席吳亮星星爺的能力高到咁，政府真係怕捉住佢隻手，佢都推唔到個議案去表決。
昨日真係寫晒劇本俾佢，叫佢一步步咁推進，而一開局建制派就由林大輝做聲勢話星爺唔夠強硬，俾個位佢揸正嚟做。另一方面民建聯大佬譚耀宗頂住班建制派，唔俾佢地走散。
咁陣容幫星爺，佢初段仍搞出事，壞就壞在泛民議員梁耀忠提出規程問題時，梁耀忠行事未算太離譜，星爺都要趕佢出場，搞到泛民有機會起哄保護梁耀忠，終於休會後有人教路，星爺收回決定平息事件。
財委會初段亂成咁，政府中人都擔心今次又搞唔掂，幸好捱捱吓終於捱到去表決通過。
政壇高人分析，新界東北發展無可能唔搞，否則8、10年後公屋、居屋、私樓全部都唔夠，受苦的只是市民。泛民議員初時都無咁激，隨著立法會外反對活動在三、四個星期前升溫，泛民在會內也愈來愈激，唔玩夠唔肯走，但問心講泛民中的溫和派亦擔心玩瓜咗撥款自己要受靶，所以有相當一部份人其實唔係想玩到咁絕。衰在星爺無能力控制局面，無法在窄窄地的空間中走過。
不過好囉，捱埋今屆會期，立法會放暑假後，財委會選過主席，我睇無論建制派或反對派，都無人會選星爺留任啦。
