政事
亞視狀況有微妙變化，持有兩億元亞視可換股債券的查懋聲兄弟怕亞視賣咗盤還唔到債，在4月入禀將亞視清盤，昨日突然話亞視老細盛氏家族和王征「義薄雲天」出手相助，代亞視還咗錢俾查氏兄弟，事件得以解決。
不過亞視員工傳出消息，6月人工都未出，公司話爭取在下周初之前發放。員工收唔到人工，當然唔多老黎啦。亞視一直蝕緊錢，之前係靠盛氏家族和王征每月借2000萬出來吊命出糧，如今佢地咁搵咗2億還俾查氏兄弟，真係還得錢嚟未出到糧。
不過亞視幕後人咁辛苦都要度水還兩億俾查氏兄弟，確實有啲玄機，因為上法庭打官司唔係一頭半個月可以解決，拖番半年一年唔難，若然水緊，按理無逼切需要還錢先。
聽聞包括英皇大老闆楊受成在內不同財團，正在同亞視老闆洽談收購，但其中一個結在於查氏兄弟的兩億債權和清盤官司，因為清緊盤都唔知有幾大不確定性，買家唔係幾想掂，所以王征等幕後老細唔代亞視還咗條數，好難賣盤。如今亞視未出糧都拼死還錢，似乎預示阿征哥開始決志要賣盤啦。
Ariel
** 博客文章文責自負,不代表本公司立場 **
「佔領中環」全民投票結束，有78.8萬人投票。真普聯方案獲最高票數，得票率超過四成，而棄權的只有8.9%。佔中發起人戴耀廷今早在電台話，由於三個方案都有公民提名成份，佔了投票人的91%，中央要正視。
中央唔等戴耀廷講都出咗招，《人民日報海外版》發表評論文章，指香港有人與外國演雙簧，搞亂香港個局，篇文題為「祖國的戰略定力是香港之福」，內文直指「美英等國一邊承認香港在一國兩制下取得的成就，期望從香港的發展中獲得經貿實利，一邊又禁不住干預香港事務的誘惑，寄希望於把香港打造成牽制中國的橋頭堡。港內極少數人則花樣翻新地在香港製造政治麻煩，時而“占中”，時而“公投”，與外部勢力形成干擾破壞一國兩制在港實施的“雙簧戲”，損害香港的繁榮穩定。」
呢篇文特別之處第一是點名「美英等國」，過去阿爺鬧呢啲國家都只係講外國勢力，今次係開名啦。第二是直指搞「佔中」者同外國勢力「唱雙簧」，比較不客氣了。
聞說阿爺對公投極之氣憤，質疑呢啲網上投票有幾成真，當中有幾多是未成年人士去投。佢谷住道氣，就由《人民日報海外版》先發吓炮。
