國際媒體好失望

昨天美國國務院發言人很快就香港遊行發表聲明，原來因為佢地美國都睇到直播，CNN、路透等國際大傳媒，雲集香港，直播遊行示威全過程，所以美國國務院差不多可以即使回應。

另外台灣幾家電視台也鬥快直播，即使屬於TVB的TVBS都有派採訪隊來港，幾大台灣電視台鬥拍香港示威，好像怕錯過什麼似的。追查之下，無論老外電視台也好，台灣電視台也好，今次之所以咁重視，原來見到早幾個月台灣的「太陽花」學運搞到咁勁，聽到學民思潮和學聯話佔中，估計在「太陽花」效應，香港必大起衝突，首先學生會癱瘓中環金融核心區唔走，而香港警方清場時也會出現流血衝突場面，打將起來，應有助收視率。

點知出咗個反高潮。首先係學生無激烈行動，坐咗半晚郁都無郁無甚睇頭。其次係香港警方執法無乜瑕疵，清場時也依足規範程式，舉牌、播放勸喻，先請後抬，即使好挑剔的西方傳媒，也沒有拍攝到警方有不合理動作。至於示威者投訴無早餐食，捉到頭頸紅咗之類，見慣大場面的老外傳媒就唔係咁重視，血都唔流一滴，差人又無出警棍打人、無出催淚彈、水炮，老外觀眾毫不動容，講多啲恐怕仲幫咗香港警察樹立形象正面形象，因為老外警察無咁斯文。

結果係點？老外電視台話香港示威無料到，今日撤晒！

Ariel

** 博客文章文責自負,不代表本公司立場 **

學聯和民陣試搞佔中，警方半夜開始清場，雖然最後拉咗幾百人，但最幸運是無人流血，這已是最好的事。

Ariel今日一起身就有好多人問佔中情況，不同派別都有，都關心清場時有無意外。有人講起昨晚佔中只有一兩千人，似乎未成氣候。不過即使建制派中人都相信，今次只是學民思潮和學聯自己試玩，泛民未有動員市民參加，人數唔作得準。加上阿爺未全面亮牌，等阿爺亮牌，否定公民提名，甚或等到阿爺方案成為事實時，泛民支持者才會全面動員佔中，所以唔好以為今天咁和平，將來又係咁和平。

政界人士亦關注在公投和遊行後，阿爺態度如何，會唔會軟化。按政壇高人分析，雖然公投和遊行有唔少人參加，但阿爺唔會改變，因為泛民既無意談判，而阿爺讓步空限亦不多，唔似會睇到公投就縮。

佢話阿爺對泛民的溫和派也有意見，話佢地一見公投人多少少，就潛晒水話唔再搞溫和方案，變咗阿爺想傾都無人可以傾。咁樣玩落去，只會出現一個「阿爺鬥激進泛民」的局面，沒有走棧的空間了。