立法會愈玩愈大，昨日人民力量陳志全叫點人頭成功製造休會，今日黃毓民杯掟特首。7.1之後街頭未出亂事，但議會內已經反枱。在立法會放暑假前餘下的日子，好可能在泛民拉布中渡過。
政治風起雲湧，但仍然有唔少小市民唔係點理事，只係關心樓價。我認識一對30來歲的夫婦三四年前沽了500幾呎的自住樓，收番350萬，一心想等樓價跌買番個大啲單位，結果當然不能如願，樓價愈望愈升，他們出外租屋租金係咁加，過兩年租約滿又要搬。這一陣子樓市又來一個小陽春，小兩口子沽咗的單位現價都升到500萬，當然睇到都眼寃。老婆怪老公「麻鬼煩，做乜沽咗自住樓等樓價跌」，老公又怨老婆「你當日夠話好，你都無阻住我沽樓啦」，總之搞到家嘈屋閉。
老公等咗兩年買唔到樓，又俾老婆哦，開始按奈不住，話如果樓價再升，佢地被逼都要買番間，「否則呢一世都買唔樓」。雖然我覺得好難講到「呢一世」咁死，但人地搞到出現家庭問題啦，外人都唔好咁多意見，唔係搞到人離婚唯我是問。
另一個朋友的處境不同，佢係高級公務員，行將退休，個仔做咗幾年嘢，想明年結婚，而家等老豆同佢出首期買樓，呢一兩個月一邊睇，樓價又反彈向上，愈嚟愈心急，因為阿仔至遲都想今年內買到，裝修幾個月，然後結婚入伙。而家市區樓中小型單位郁啲都600、700萬，老豆俾三成首期加手續費裝修費，當650萬一間樓，個仔都要供近455萬，以2.25厘息，供25年計，而家咁低息都要供2萬一個月，係朋友個仔同未來太太收入的一半以上，老豆出雞個仔出鼓油，都唔係咁易頂。
我問朋友如果加息阿仔點算？朋友有點沮喪，話「個仔結婚唔通同我地一齊住咩？唯有希望個市唔好再升，等佢地買樓唔好咁貴啦!」
呢班等住買樓一族，而家都幾慘。因為本年度立法會只剩下幾日會期，但包括「樓市辣招」等多項草案都尚未通過，政府爭取在本月15日晚即係本屆會期最後一晚通過「辣招」草案，而家睇嚟都有啲危，唔知道過唔過得到，若過唔到市場又會收到「辣招無效」的訊息，樓價好可能會再升一浸。
唔好怪我唔信啲政客，因為打到九彩之後，邊個得益呢？ 若然立法會過唔到辣招法案，樓價再急升，逼到更多市民搶住入市，發展商大舉散貨，市民接晒貴貨，條數又點計呢？市民若因此而買樓買貴100、200萬，真係做多10年都頂唔到條數，最後都唔知問邊個追討。
盧永雄
七一遊行參加人數眾多，是近年的高位，不過實質參加人數多少，年年都係一個爭論焦點。遊行前和朋友吹水，已經估無論參加人數多少，民陣最後公布的數字一定比2003年50萬人數高，造出「創紀錄」效果。
到黃昏時警方公布有9.2萬人由維園出發（警方最後公布的數字是高峰期有9.86萬人），民陣未公布數字，朋友間WhatsApp來去，有人估51萬，有人估60萬，有人估70萬。最後開估，民陣話保守估計有51萬參加，估51萬者竟然數字都貼中，果然係「破紀錄」。
不過兩個學者估計數字就截然不同，鍾庭耀的港大民意研究計劃估計，遊行人數介乎15.4萬至17.2萬人，而據港大教授葉兆輝所做的統計，遊行人數大約介乎11萬至13萬。又係出現這種局面，學者估計較接近，都係10多萬人，同民陣估的51萬差天共地。
警方的數字是點算維園出發的人數，沿途加入的人不在警方統計範圍。而兩個學者統計方法全面一點，是在沿途設站，在高位估算行經人數，再按估計中途插隊人數調高數字。而民陣就唔知點估啦。
參加遊行人數是客觀事實，兩個學者估計有3幾萬差距，可能是推算插隊人數的假設差異，雖然差距，皆屬可信納範圍，但以兩個學者和民陣估計的差距，起碼差30多萬，只有一組數字為真，一組為假。俾我揀，我就信學者啦。
自2003年大遊行之後，民陣唔想遊行人數跌，起碼唔想跌好多，就不斷講大個數，結果民陣每年公布的數字，就相當天馬行空了。學民思潮鐘意送「誠實豆沙包」俾人，咁就要揀呢個誠實豆沙包，係送俾民陣，還是送俾鍾庭耀啦。
從政者貴誠實，否則你吹我又吹，搞到真相唔知係乜，想真實地探求民意的變化，都失去可信的基礎。我建議民陣負責人買本《甘地傳》看看，睇睇甘地對真理同信念怎樣堅持，他為絕不放棄素食理念，太太重病，醫生要餵牛肉湯給她喝，甘地拒不接受，可以抱走太太回鄉。你叫甘地講大話，殺佢個頭容易一點。就是這種為真理堅持的鋼鐵信念，才令甘地可以戰勝強權。
千萬不要以為我借此為文，是想貶低遊行人數，正好相反，我話遊行人數好多，雖然未過2003年，亦已是近年高位，警方的數字也是十年高位(僅次於2003及2004年)，「人數十年新高」其實都好有震撼力了。遊行人士的訴求，執政者哪能不正視? 遊行人士要爭取沒有篩選的真普選，已是明確不過的意見。細看遊行人士的聲音，也有很多頗堪玩味的觀點，按《蘋果日報》對參與遊行者做的民調顯示，有91%受訪者支持佔中，只有8%反對; 但同樣有69%人認為佔中三子應與北京談判，認為不需要的只有28%，泛民是否不應關上和北京談判的大門?
盧永雄
