佔中日期忽成焦點

佔中預演餘波未了，正當大家睇緊點收科之際，忽然民主黨主席卿姐爆出，最快今個月就「佔中」，搞到何時「佔中」突然間成為政界議論焦點。

「佔中」發起人戴耀廷喺全民投票後仲講緊，暫時無打算號召「佔中」，要等到政府提出普選方案，佢哋會再進行第二次民間公投，如果最終政府一意孤行，意圖通過非真普選方案，才會發動「佔中」。

而家政府仲搞緊政改諮詢文件，到佢交報告俾人大，應該唔會公布住，即係話睇唔到政府方案係唔係真普選方案，咁話最快7月佔中，都要有個理由，暫時睇唔到有乜理由咁搞。

到八月下旬 人大常委會開會，若果只否定公民提名，無講明係提委會過半數機構提名，都未肯定唔係真普選方案，理論上都無公民提名都可以有方案係符合國際標準架。若然係咁，照計仲要等一段時間，去到政府抛出方案後，先去到佔中呢步。

政壇高人就覺得，可能係成個政局愈來愈劍拔弩張，後生仔預演佔中亦都搞出一啲聲勢，溫和泛民同學者型的佔中三子，在呢場運動激化過程中，似有被邊緣化，唯有講得激啲啦。先有卿姐喺城市論壇，爆料話民主黨最快呢個月、最遲下個月就要「佔中」，仲話「佔中」運動要 一波接一波。跟住「佔中」另一發起人陳健民話，如果人大常委會八月否定公民提名及政黨提名，又收窄至沒有真普選空間的，就是「佔中」時刻。

搞到本來好似未有時間表的「佔中」，忽然殺到埋身啦！

Ariel

** 博客文章文責自負,不代表本公司立場 **

教主黃毓民因掟杯事件，到警署自首即時被拘捕，保釋後當然受到支持者英雄式歡迎啦，眼見激進泛民愈來愈激，溫和泛民有啲兩面不是人的感覺。

民主教父馬丁李就開聲，批毓民掟玻璃杯咁做過份咗，要佢公開道歉，話黃教主今次咁做，係對共產黨完全有利，反而對民主派和市民就無利咁話。

毓民在自己地盤「熱血時報」反駁話無做錯，話未驚過。仲PS咗一幅好趣的圖，上面係條題係：民主阿伯叫黃毓民為掟杯道歉，下面則係「道你老味」。教主支持者真係話之你民主教父囉。

激進泛民同溫和泛民愈走愈遠，政改臨近揭底牌，咁搞落去，個局真係得個"亂"字。