政事
喺爭議聲中成立嘅金融發展局，眨吓眼就成立年幾，發表第一份年報，幾十頁概括總結過去頭十五個月工作，Ariel去睇睇，發現金發局成立時雷聲夠大，係政府高層次同跨界別諮詢機構，但份財政報告非常簡單，夾埋只有四大個開支項目，一頁紙搞掂晒，全年使咗二百幾萬啫！
金發局成立到而家，人手基本上都係由證監會、金管局等借調過嚟，財經事務及庫務局支援秘書及文書，結果過往發表六份研究報告，就試過出現有啲得中文，有啲得英文。
但主席查太史美倫並無氣餒，仲話今年會繼續對外推廣，遲啲就會拍住貿發局去巴黎做推廣！又會黐實港交所，例如佢哋去搞滬港通，金發局都出一份力去一齊搞推廣活動。
外傳金發局出場後，被現有的財金部門成功凍結，呢啲講法係真係假不得而知，總之從金發局盤數睇，睇佢使錢就認真慳家。
Ariel
** 博客文章文責自負,不代表本公司立場 **
政務司司長林鄭將於下周二在立法會提出政改諮詢報告，特首CY同時會向人大常委提交政改報告。佔中派有少少起哄，佔中三子之一朱耀明話，若人大8月明確否決真普選，可能發動「佔中」，學聯仲話在9月發起大學罷課及罷工，搞公民抗命行動。雙方對立一觸即發。
都係學聯的罷課罷工行動出位啲，一講出嚟就吸引咗眼球，雖然罷工罷課唔係香港人做慣的事情，但以如今的民情，又唔好一口咬定無人會參加，有幾多人玩，要睇當時的社會氣氛。
可能見到雙方對立氣氛太濃，早前提過政改方案的13名經濟及社會學學者，就建議CY押後至10月才向人大提交政改報告，其中一個學者中大經濟系教授宋恩榮接受電台訪問時話，香港社會就政改出現危險的對立，雙方都劍拔弩張，若特首匆匆啟動政改，擔心出現硬碰硬的一拍兩散局面。若特首押後提交報告，可令各方有時間冷靜下來。
呢班學者的確係一番好意，不過政壇高人對Ariel話，特首押後提交政改報告，唔似對大局有幫助。唔係時間長啲雙方可以坐埋傾，而係雙方無偈傾。市民對政方案所知不多，早前真普選聯盟委託港大民研進行民調，1,016名受訪者中，有68%人表示對坊間普選方案「一個都不知道」，但不知道的市民也可能投了公投票，或者簽了反佔中，多兩個月時間，也不見得更多人會去了解具體的政改方案。
佢話，而家政府洗濕咗個頭，唔會突然押後架啦，否則俾人話兵敗如山倒，咁仲衰多兩錢。
