探戈要兩個人跳

特首CY早上去咗深圳見身兼港澳協調小組組長的全國人大委員長張德江，下午在政府總部交代，純從香港做事方式去睇，可能有人都覺得見完先講架。若果從內地的做事方式睇，領導人在地方考察，一般都係離開咗考察地先會講，據聞今次咁快發布消息，係應港府方面要求。

政壇高人就解釋，政改呢壇嘢咁敏感，盡可能都做到透明啲，中央的港澳事務話事人來到深圳見CY，加上張德江又係全國人大委員長的身份，CY見佢亦係向佢交代向人大常委提交報告，係依家本港政界的熱門焦點。事後快速公布，可以話特首做到咗之前公開講過會反映意見的講法。

CY見記者時又再次講到希望做橋樑的角色，Ariel醒起幾日前，佢同政改三人組公布政改方案見記者時又係咁講，睇嚟一星期講兩次，都幾重視呢一點，似乎係想拉番溫和泛民同阿爺傾吓偈。

政壇高人就覺得，CY三番四次講橋樑呢個詞，確係有啲用意，睇嚟港府真係想有得溝通，之但係溝通係要睇雙方意願，都係果句探戈一個人跳唔到，必須要兩個人跳，假如泛民非要公民提名不可，明知阿爺話呢種做法違反基本法，都要堅持下去，咁就點搭條橋都跳唔到探戈啦。

Ariel

** 博客文章文責自負,不代表本公司立場 **

佔中三子發動公投後，表示想同政府及中央見面談政改。而政改三人組之首林鄭，就話會和包括佔中三子在內的不同泛民人士會面。

據政府公布的安排，林鄭下周開始約晤提出「13學者方案」及「18學者方案」的學者。又會在23日(下周三)及29日與泛民及佔中三子分別會晤。

Ariel留意到林鄭見面的安排，是與眾多人士會面，唔係唔見佔中三子，但也不太突出三人的角色。要知道政府並不承認佔中運動搞的民間公投，所以唔想以佢地為泛民代表。

那麼阿爺又會否和佔中三子見面呢? 知情高人話，阿爺無打算見佔中三子，因為阿爺根本不承認「公投」這種形式，不想和他們見面變相肯定了公投的合法性。更重要的因素是阿爺覺得之前中聯辦約泛民見面，泛民主要政黨扭扭擰擰不見，跟咗去佔中公投，失晒雙方協商的時機。而家佔中三子攞住79萬公投票，就嚟約見，阿爺覺得佢地挾民意逼中央，完全接受唔到呢種態度。

Ariel覺得搞佔中搞到雙方無得傾，硬晒軚，真係好可惜。