政事
有自稱股民人士在網上大爆肥佬黎機密文件，有800幾份咁多，真係睇到Ariel眼都曚，當中部份是肥佬黎對泛民各政黨及人物的政治獻金，兩年俾4000萬，又真係幾誇張。
當中部份捐款收據都有埋，有泛民議開始唔認，後來知道詳情都要認，但係就唔肯詳細評論。記者好有興趣睇吓例如陳太接受300多萬捐款的詳情，但係仲未搵到。到底一個並非議員的退休人士，搞個2020組織吹吹水，點解要收300幾萬捐款咁多?
肥佬黎反應低調，昨日無回應，今日佢報紙亦唔見有乜還擊，仍然以沉默應戰。由於爆料人有咁多具體材料，真係想唔認都難。
有公關界高人提醒我。爆料人既然搵到800幾份堅料，你點知佢無另外800份在手，唔見到未必係無，可能係留一手唔出住，等你否認，然後再從你否認的方向掟啲堅料出來，證明你講大話，打到你死。這是壹傳媒慣用的手法，遠的有程介南事件，近一點有梁榮忠車震事件，都係第二波先至爆死人。而家爆料人唔知係唔係用緊江南慕容家的手法，「以彼之道，還施彼身」呢?
Ariel
** 博客文章文責自負,不代表本公司立場 **
中央港澳工作協調小組組長張德江前兩日在深圳與香港各界見面，睇其發言並不是一面倒強硬，強硬中亦保留了一定的空間。
人大常委會下月底開會決定香港政改的框架，張德江多次表明公民提名不可接受；另外自由黨黨魁田北俊話張德江對他們表示，「普選出來的特首必須愛國愛港，這條政改底線不能改變。」看來否定公民提名及特首要愛國愛港這兩點，是中央核心底線，預料在人大常委會決議時會申述出來。
不過張德江的講話也非鐵板一塊，他另有兩點說法被視為留有空間。首先是講普選特首必須愛國愛港時，同時指「並非所有泛民都係不愛國愛港」。這個說法其實可講可不講，但講了出來，令人明白所謂愛國愛港標準，並不是要趕絕所有泛民不可參選特首。
另外人大常委范徐麗泰亦引述張德江指，民主發展要有一個過程，要一步一步行，范徐麗泰話張德江咁講:「香港有人認為這次政改是最終目標，很清楚並非如此，我的理解是如果香港有普選行政長官之後，民主發展依然會向前行，這次是發展中好重大的一步，但將來一步步發展下去。」張德江講明這次政改並非終極，令「袋住先」的誘因大大增加。
Ariel覺得中央基本取態仍然強硬，人大常委會有可能為一個明確框架拍板，但張德江留下泛民也有愛國及今次政改非終極兩點餘地，亦保留和泛民對話談判的空間。
