張德江強硬中留空間

中央港澳工作協調小組組長張德江前兩日在深圳與香港各界見面，睇其發言並不是一面倒強硬，強硬中亦保留了一定的空間。

人大常委會下月底開會決定香港政改的框架，張德江多次表明公民提名不可接受；另外自由黨黨魁田北俊話張德江對他們表示，「普選出來的特首必須愛國愛港，這條政改底線不能改變。」看來否定公民提名及特首要愛國愛港這兩點，是中央核心底線，預料在人大常委會決議時會申述出來。

不過張德江的講話也非鐵板一塊，他另有兩點說法被視為留有空間。首先是講普選特首必須愛國愛港時，同時指「並非所有泛民都係不愛國愛港」。這個說法其實可講可不講，但講了出來，令人明白所謂愛國愛港標準，並不是要趕絕所有泛民不可參選特首。

另外人大常委范徐麗泰亦引述張德江指，民主發展要有一個過程，要一步一步行，范徐麗泰話張德江咁講:「香港有人認為這次政改是最終目標，很清楚並非如此，我的理解是如果香港有普選行政長官之後，民主發展依然會向前行，這次是發展中好重大的一步，但將來一步步發展下去。」張德江講明這次政改並非終極，令「袋住先」的誘因大大增加。

Ariel覺得中央基本取態仍然強硬，人大常委會有可能為一個明確框架拍板，但張德江留下泛民也有愛國及今次政改非終極兩點餘地，亦保留和泛民對話談判的空間。

Ariel

** 博客文章文責自負,不代表本公司立場 **

特首CY早上去咗深圳見身兼港澳協調小組組長的全國人大委員長張德江，下午在政府總部交代，純從香港做事方式去睇，可能有人都覺得見完先講架。若果從內地的做事方式睇，領導人在地方考察，一般都係離開咗考察地先會講，據聞今次咁快發布消息，係應港府方面要求。

政壇高人就解釋，政改呢壇嘢咁敏感，盡可能都做到透明啲，中央的港澳事務話事人來到深圳見CY，加上張德江又係全國人大委員長的身份，CY見佢亦係向佢交代向人大常委提交報告，係依家本港政界的熱門焦點。事後快速公布，可以話特首做到咗之前公開講過會反映意見的講法。

CY見記者時又再次講到希望做橋樑的角色，Ariel醒起幾日前，佢同政改三人組公布政改方案見記者時又係咁講，睇嚟一星期講兩次，都幾重視呢一點，似乎係想拉番溫和泛民同阿爺傾吓偈。

政壇高人就覺得，CY三番四次講橋樑呢個詞，確係有啲用意，睇嚟港府真係想有得溝通，之但係溝通係要睇雙方意願，都係果句探戈一個人跳唔到，必須要兩個人跳，假如泛民非要公民提名不可，明知阿爺話呢種做法違反基本法，都要堅持下去，咁就點搭條橋都跳唔到探戈啦。