自由黨拉林大輝入黨

這次中央港澳工作協調小組組長張德江在深圳見完建制派後，各派人物感受殊深，部份更有「阿爺唔客氣」的感覺。

自由黨有些細微動作，惹人關注。該黨在九龍灣宏泰道的總部，是黨魁田少的物業，最新消息是田少打算收回物業，自由黨總部會搬回立法會附近，令人猜測田少是否有少少意興闌珊。

田少當日上深圳見張德江之前，還上商台May姐的節目，提到商界一直以來，都唔知選特首要愛國愛港。呢啲講法雖然香港人啱聽，但係就同阿爺口徑唔太夾啦。

田少見張德江收到乜嘢訊息無人知。但佢地一直推一個政改方案，話獲得提委會最多提名的前三人可以入閘選特首，而無需要提委會過半數通過提名。高人估計，這個方案已被阿爺打殘，所以田少自己本人或佢支持的人選，都唔係咁易入閘選特首，所以無晒心機都唔出奇。

有個傳聞是自由黨正積極拉攏林大輝入黨，田少俾個黨魁林大輝做，仲讓埋新界東個位俾佢去參選。林大輝現時由廠商會的工業界第二功能界別當選議員，但廠商會就大力反對佢加入政黨，出現自由黨和廠商會爭人的局面。

而家自由黨有五個立法會議員，加埋林大輝有六個，直逼有七個立法會議員的經民聯，所以田少讓位俾大輝，呢條數都有得諗架，最後唔知大輝哥點行呢步棋。

Ariel

** 博客文章文責自負,不代表本公司立場 **

肥佬黎捐大水俾泛民爆光，在政圈如深水炸彈一樣，炸出千重浪，最好笑的是唔止炸中泛民，重炸中一啲富豪。

話說一個中型富豪睇完單新聞後騰晒雞，面都青晒，四圍問人點算，原來佢表面愛國，私底下都有捐水俾泛民，按佢自己個講法，而家啲泛民議員咁惡，捐錢就當做交保護費啦，萬一自己出事時，泛民俾番兩分薄面，又或者拉布時，唔好搞自己有關的法案。(佢擺明收買議員，亦唔見議員收咗錢有申報)

佢本來以為呢啲派水行動，神不知鬼不覺，點知見到肥佬黎捐水啲料爆晒出來，就話「死啦，乜啲電腦咁唔安全架，好似馬賽條片咁，乜都俾人睇晒。」佢好怕有朝一日，自己做埋報紙頭條，唔知點同阿爺交代。佢四圍搵人問，睇吓點拆呢個局。

有高人話呢啲嘢做得就要預咗有人知，下次唔好當老馮。高人射咗一條橋俾佢，不如表吓態，補補飛啦。唔知富豪趕唔趕得切做啦。