缺水難捱

《主場新聞》唔做，網媒經營唔易，令人齊聲一嘆，深感香港這個資本主義社會，錢唔係萬能，但無錢就萬萬不能。

《主場新聞》在2012年7月28日創刊，但在《主場》創刊前，蔡東豪拍住一班做內容的精英，已經承包咗《蘋果日報》財經版一個「金融中心」專版嚟做，當時傳聞肥佬黎幾睇得起蔡東豪，好大手筆一年俾500萬佢搞呢個版，若然屬實，一個月有42萬，都好見使。所以蔡東豪就在觀塘租了辦公室，請專人去搞。亦由於有那筆「打底數」，後來就搞埋《主場》，反正都請咗骨幹，亦有辦公室，因利承便搞埋網媒。

不過《蘋果日報》呢筆錢去年就生變，由於肥佬黎有指令要《蘋果日報》削減5%開支，各部門都要諗計慳錢，最直接係削5%人手，但可以唔斬人，無主管想殺人。去到財經組，佢地就話要慳不如慳「金融中心」專版那一筆，《蘋果》財經組覺得那一版講政治多過講財經，對佢地可有可無，與其叫佢地殺自己人，不如斬咗「金融中心」那一版。

結果講數之下，亦無斬晒，就將「金融中心」由每週五次減到一次，《蘋果》財經組傳聞「金融中心」開支由每年500萬減到200萬(數字只是傳聞無法核實)，財經組中人話抹一額汗，慳番幾百萬，佢地就唔使裁員減薪啦。

有人快樂就有人愁。《蘋果》財經組開心，《主場》收益減少自然傷心。估計《主場》每年開支約1000萬，《蘋果》「金融中心」的500萬收入是主要收入來源，隨時佔《主場》收入的8、9成，一減就無一大截。而且萬一《蘋果》有第二波節支潮，剩番呢200萬隨時無埋，令人諗起都心寒。

做生意係咁，睇到曙光好多人願意捱，但當佢一盤生意嚟做，又唔見曙光時，就唔會頂落去。

Ariel

** 博客文章文責自負,不代表本公司立場 **

網上傳出大量和肥佬黎有關的機密文件，還有些小故事。肥佬黎夫婦在今年3月19日在中環歷山大廈8 1/2 Otto e Mezzo餐廳請客，客人包括前美國駐港總領事楊甦棣夫婦、陳方安生、東亞銀行主席李國寶及李柱銘夫婦。

有人睇到新聞報道，話呢餐飯係續集，這時楊甦棣早已離任，仲有上集。去年8月楊甦棣離任前夕，肥佬黎已搞咗一餐為楊送行，還鬧出肥佬黎大罵餐廳老闆事件。肥佬黎去年8月15日在壹週刊他的「事實與偏見」的專欄中，不點名大罵一個「藝術家打扮的食店老闆……他紥了條馬尾，蠻有型的，的確有藝術家的模樣」。肥佬黎大罵這個老闆在桌前朗誦他的生平，阻住他們談話，到影相時又「以張大千的架勢站在我們中間」。肥佬黎大罵「此人麻木如此，如果是藝術家，一定是裝出來的」。

當事人是劉健威，俾肥佬黎咁鬧，條氣好唔順，話所有著名食肆都有老闆同出名客人拍照留念的習慣，只是肥佬黎睇唔開。

呢啲只是茶杯裏的風波。楊甦棣離任，肥佬黎都請佢食咗咁多餐飯，可見雙方交情不淺啊。