當未來前途是困難的

朋友近日去了廟宇求籤，之後找了一位玄學藝人算命，再找了一位業餘朋友回家看風水，見到我就問近日他的氣息如何，我第一時間就跟他說：「你撞鬼呀！」他即時嚇到面青並跟我說：「我真係衰成咁? 時運真係咁差? 」 我笑笑地跟他說：「我的意思唔係咁，頭先講笑啫，我的意思是我撞鬼你呀，好人好姐，碩士畢業又讀精算，樣樣野你都問晒, 你差在未搵個神婆在廟街同你卜卦算命，使唔使咁呀?」

朋友對我說，他現在的工作很不順利，上司針對他、加薪無望，看見一些能力比自己弱的同事反而平步青雲；不巧地，近來犯了一個錯誤，老闆已經表明在來臨這一年會深切觀察他的表現。他認為前路難行，所以希望轉運，利用求籤、擺風水陣，用不同迷信的方式令自己可以捱過這年的困境。我說，風水命運占卜，在心理上可能是有幫助的，但當人人都告訴你很差的時候，我相信就等於你游水抽筋時，突然游多兩條大白鯊過來，你會死得仲快，打擊更大。

我也有試過逆境，在生理上及心理上一樣都有，大家唔好誤會，生理的逆境是我人生最怕的事 - 行樓梯。我對腳行樓梯唔知點解好唔掂，如果要上三、四層樓梯，就真係跳樓都唔得掂，更何況要我行針山，有成十幾層樓的樓梯，見到已經想死。 但是我有一個方法可以令自己可以容易地捱得過，就是扶住個欄杆，看住腳尖一步一步咁行，這個方法你只要將焦點集中在當下，行好每步路，小心謹慎，肯定唔會仆倒亦不會被長長難行的樓梯而打擊到自己的鬥志，很快地在烈日下望住自己的陰影你就可行完針山的樓梯。

人生也一樣，當你明知未來是打逆境波的時候，就算你問的是「神算」也幫不了你，命運是很難靠一個風水陣來改變，但是態度上就可以即時改變，當態度變，行為就變，性格也變，命運就一定會改變，就是這個方法，專注每日的工作，夠精神，工作時小心奕奕，不明白的事物就問得清清楚楚，不懂怎樣做的就要尋求助力，要用信心、意志與不放棄的精神幹下去，就等於行針山的樓梯一樣，怎樣會無運行呢？！

朋友聽完後我再補充了一句，我面對逆境的方法是做好自己每一日，行好自己每一步，過好自己每一個鐘，無風無險又一天，晚上有覺好訓就可以了。就如聖經上也有一句話：「一天的難處，一天當就夠。」

黃毅力

** 博客文章文責自負,不代表本公司立場 **

我從前當差時，在旺角總區做副行動主任，其中一個職責是掃黃，最近和朋友吃飯，他問起我掃黃的經驗，有什麼感受特別深的東西，我就講了一些掃黃感想。

大家睇粵語長片時，睇到好多「逼良為娼」的故事，其實現代社會，根本好少逼良為娼的故仔，反而我做掃黃時，是想「逼娼為良」，叫性工作者不要貪圖高收入，早早行番正途啦。

黃色事業要拉拉唔晒，要鎖鎖唔晒，但我最想解決的是「私鐘妹」的問題。有人投身淫業集團，唔係做妓女，只係跑私鐘，即係唔開門做生意，只係俾人包一段時間，由集團介紹佢地俾大老闆包，少則一兩個月，多起上來長包都有。呢啲「私鐘妹」做的是大生意，自然是我地想重力打擊的對象。

不過查案查落去，你就會發覺呢個世界千奇百怪，跑私鐘的不止是學生妹，還有婦女，仲有睇起上來十分高貴的良家婦女。呢啲女士平日係你望佢多兩眼佢會告你非禮嗰隻，點知私底下都有做。當然，亦係賣到最高身價，我見過最誇張的例子，係可以做兩年收300幾萬。淫業集團出得300幾萬糧俾良家婦女，當然不是為慈善，而係操控佢做生意，俾咗咁多錢佢，還可以獲厚利，生意幾大，可想而知。如果唔係大破淫業集團，起埋佢個電腦，查晒裏面的資料，你點估都估唔到，有「良家婦女跑私鐘」的故事。

我知道這件事，第一個反應是O晒咀，問題不是淫業鉅子，佢地做乜都睇成生意啫。我反而覺得，最大問題是跑私鐘的婦女，她出身良好，真係唔知做乜要和淫業鉅子走埋一齊? 而且良家婦女本來家庭收入都好高，為乜仲要出來做呢? 究竟是衰大洗，還是衰貪心? 或許她以為做呢啲嘢神不知鬼不覺，賺咗錢無人知，誰不知呢個世界「若要人不知，除非己莫為」。

事情的表皮一撕破，街坊的睇法唔同晒，平日良家婦女高貴的形象，如今蕩然無存，見佢行過都眼超超，心諗你好似咁高貴，都係出來做啫，暗中做同擺明做，本質上無分別呀。

我覺得呢個世界，萬惡離不開一個貪字。你可能會話佢做乜咁cheap? 但你未試過面對咁情境，遇上淫業鉅子，佢300萬一張支票開過來，俾著你是否頂得住唔收。你頂唔順，就唯有賣身俾人，受人錢財，幫人搵錢。即使我做過掃黃，但要救呢啲良家婦女出火坑，一啲都唔易呀。