譚Sir提醒從政者 被屈成收窄市民言論空間

新當選的全國人大常委譚耀宗譚Sir被記者提問時，講到《基本法》源於憲法，而憲法新修訂的內容，說明中國共產黨的領導地位，以及中國特色社會主義的特質，是要有中國共產黨的領導。今後「結束一黨專政」的講法可能跟《基本法》以及憲法新修訂內容有牴觸，日後想參選立法會的人士要考慮會否有所牴觸。

呢番講話招徠泛民議員批評，公民黨立法會議員陳淑莊話，譚Sir的講法違反基本法，收窄言論空間。身兼支聯會常委、街工立法會議員梁耀忠就認為，有關講法不只針對立法會議員，而是大幅收窄香港的言論自由，反問是否市民以後不可再叫「結束一黨專政」這類口號。

政壇高人就話，呢兩則評論與譚Sir所講風馬牛不相及，譚Sir係指要參選的人，提醒如果叫「結束一黨專政」可能因違憲被取消參選議員的資格。陳淑莊同梁耀忠就講到好似市民不可以叫呢類口號，是縮窄言論空間。

高人認為，其實叫呢類口號係不現實，叫了近三十年不但撼動不了中共執政地位，相反中共在內地是越來越有威望。政客不断鼓動市民叫這些口號，只會不斷損害兩地關係，對維護「一國兩制」毫無幫助，泛民要反思吓叫來有什麼意義？

其次，譚Sir作為資深從政者，又參與過基本法的起草，以他對憲法和基本法的認識，勸喻未來有志從政者要注意呢啲問題，相信都係出於善意，係以過來人對未來人的提點，無乜唔妥。

相比起，有啲法律學者日日同後生仔講「違法達義」，搞到班後生仔熱血沸騰，踩晒法律底線，甚至被判刑，咁又係咪負責呢？

再者，有志從政者應該在從政前先理解憲法和基本法，理解國家的政治制度和文化，咁樣先係做大事之人的從政態度。想靠叫口號一夜成名，從政路應該不會行得太遠。

依家興起底文化，最好參政前做足預防工作。好似宣布鄭若樺任律政司司長當天，即爆出僭建風波，搞到灰頭土臉。將來從政者如因被揭違憲而取消資格，係咪浪費咗青春呢？有志從政者係咪都應該認真想吓譚Sir的「逆耳忠言」內容呢？！

Ariel

** 博客文章文責自負,不代表本公司立場 **

兩會開到尾聲，中央對香港有何看法，自然成為政界關注焦點。政協常委何柱國，今日上大台接受訪問，重點講中央好關心香港青年人出路，叫特區政府好好關注樓價高升問題，要想辦法增加土地供應，又話可以考慮大力提高境外人仕買樓門檻，包括大加辣招稅，控制樓價以免急升。

人稱炒何的何柱國係北京回港即爆料，佢係接受大台訪問期間，仲擰張紙仔出嚟照讀，提出咗兩點，一係叫現屆官員對過去政府作出的承諾要認數；二係叫啲官要做嘢，庸官懶官要好好整整冶。由於何柱國言談間有提到財政司司長陳茂波，外界因此有啲捕風捉影，相關說法係咪對茂波有所暗示。

據聞，有人問過炒何點解讀完紙仔要提陳茂波，原來佢意思係茂波作為財政司司長要有所作為，特區政府要支持佢做嘢。陳茂波係上屆政府負責搵地，呢樣嘢今屆政府要繼續，仲要加大力度支持佢。何柱國係訪問度，其實有講到叫特首支持茂波做嘢，呢個係佢提及茂波個名的真正意思。

成個訪問，何柱國不斷叫政府幫吓青年人，當中一個重點係搵多啲地，而且要用啲有實效嘅方法，唔好搞的花招，在維港以外大量填海，就係一個搵地的好方法。如果搞嚟搞去搵唔到地，幫唔到青年人上樓，咁呢啲就係庸官懶官，唔可以俾佢輕輕過關嘞。