商經局有排煩

私隱專員公署月初公佈「人對人」直銷電話的意見調查，建議政府規管這種直銷，但係就搞出一場小風波，私隱專員蔣任宏發表網誌詐型，話透露調查後，收到由蘇錦樑的商務及經濟發展局來信，話對他公佈調查報告方式失望兼不滿，話公署公布前無與商經局溝通，又質疑調查結果咁話。

蔣任宏都幾硬，形容對收到商經局來信「有點驚訝」，強調公署運作獨立於政府架構，是「核心價值」。

表面睇只是茶杯裹的風波，但知情人士話矛盾有啲深層次。首先蔣任宏是前朝請來，未上任已爆出蔣當郵政署長時設監視鏡頭的爭議，當時是林瑞麟話蔣任宏做得嘢，力挺他過關，蔣上任後都努力表現，做場好戲。但他和現屆政府如蘇局長無乜聯絡，自然易生磨擦。

而大家拗緊的問題也不是意氣之爭。因為「人對人」直銷和機器直銷不同，「人對人」直銷涉及銀行等眾多行業，它們早就對商經局話，如果禁止「人對人」直銷，對它們的生意影響好大，商經局比較同情他們，和私隱專員的睇法有直接衝突。

蘇局長這邊玩冰桶好像和王維基冰釋前嫌，那邊又和私隱專員開波，睇嚟蘇局長都有排煩啦。

Ariel

** 博客文章文責自負,不代表本公司立場 **

全城玩冰桶挑戰，今日有人上載一條片，有個美少女揸住張「我愛梁振英」的牌，估計在中環街頭，大叫「我今日出嚟，就係要用行動同聲音支持梁振英！」

她跟住就除衫，露出深長的事業線，然後一桶冰水照頭淋，有旁觀者睇住她濕淋淋豐滿的身材，大叫一聲「好！」她跟著點三個名叫人陪佢玩，排頭位的自然又是 CY 。條片到晚上都有過萬人睇咗，美女真係永遠殺，著少啲衫濕埋身就更殺。

雖有美女撐場，CY也莫高興得太早，有傳聞美女是某電視台人士，借撐CY出吓位，不知有無玩 CY 的後著。

講開又講，昨日好多人挑戰CY淋冰，佢真係好認真諗過，最後決定唔淋，都係捐錢算數。咁又係，暫時都未見過有行政首長淋過喎，佢唔想咁出位又唔出奇。