心好月圓

好快就到中秋節，「人月兩團圓」，但大家喺慶祝時，有無諗過社會上仲有好多人需要關心呢？

Jack 知道好多非政府機構，都會喺中秋節舉辦活動，好似救世軍就搞咗個「心好月圓」行動，職員同埋義工會向獨居長者、基層家庭和露宿者派發月餅，又會舉辦70多項活動，同佢哋歡度中秋。

救世軍提供照片

同救世軍公關傾起，呢個「心好月圓」中秋行動已經舉辦咗20幾年，預計今年會有超過一萬六千人參與，當中四分三左右係獨居或者住喺院舍嘅長者。

Jack 對月餅無咩興趣，但身邊好多朋友都會收到太多月餅，食都食唔晒，咁就可以捐俾救世軍，等佢哋送俾呢班長者、殘障人士、低收入家庭同無家者，增添暖意。

大家可以喺下個月五號或之前，將月餅送去救世軍全港31個收集站，好讓義工同職員趕得切喺中秋佳節前，將月餅贈予有需要人士手中，等佢哋得到溫暖同埋關心。

Jack

** 博客文章文責自負,不代表本公司立場 **

人生少不免會做錯事，最重要係識得改過，仲要有勇氣面對，屋企人支持亦都係重要的力量。Jack 參加咗個活動，見到一班曾經犯罪違規的青年人重回正軌，改過自新。

 

Himgo從「一哥」手中接過獎項。

眼前的 Himgo 外表斯斯文文，未必估到只有19歲的他，高小起已流連街頭，初中便犯下刑事毀壞、持械打架等罪行。

他14歲開始吸毒，瘋狂到試過一星期不見天日地吸毒，連最錫他的嫲嫲過身，都無法見到這位「乖孫」最後一面。

直至一次因為刑事毀壞被判入男童院， Himgo開始反省，決心戒毒，得到家人鼓勵和社工支持，他下定信心，連手機號碼都改了，不再理會之前的「朋友」。

如今Himgo重拾書包，返學唔遲到，早睡早起，唔再過以往花天酒地的生活。

佢同其餘七位曾誤入歧途的年青人，被青年協會「重新出發」青年嘉許計劃選為得獎者，更由「一哥」曾偉雄手中接過獎項。

青協會長蔡定國醫生話，社工從每年處理的四千個個案中，選出四十多位青年，經過兩輪面試，最後選出八名得獎者。雖然佢哋雖然犯罪違規，又或者有不愉快經歷，但都勇於改過自新，努力和成果都令人佩服和讚賞。