人大常委強硬拍板，佔中運動睇嚟會在十月一日上場，之前先來罷課一周，表面上看，雖然泛民對人大決定反對聲音好強，但社會上尚算平靜，令人覺得阿爺都會相當Relax(輕鬆)。
不過，Ariel從四方八面收風，搵啲接觸過阿爺的人傾吓，發覺完全唔係咁的一回事，香港人覺得佔中未嚟，或者覺得佔中可能無料到，有啲放鬆，阿爺就高度戒備，覺得唔可以睇輕這些罷課佔中的行動，恐怖星星之火，可以燎原，所以你見阿爺無論是輿論上，或者行動上，都繼續密密出手，以應對十月初可能出現的亂局。
昨晚佔中三子之一的戴耀廷承認佔中失敗，雖然佢講得唔係清楚，但大致上的意思係話，佢哋本來期望佔中運動可以逼到阿爺讓步，但結果人大常委會強硬定出框架，阿爺無讓步，所以承認失敗。
有高人咁講，如果戴耀廷相信佢哋自己這些邏輯，佢哋真係相當失敗，因為正正就係佔中，搞到咁高調，想逼阿爺，先激發阿爺強硬回應，提早喺人大常委會已劃清框架，如果唔係佔中搞到咁行，或許呢個決定仲會延遲作出，當中會有更加多的討價還價的餘地，如果佔中的目唔係對抗，佔中的目的只係想嚇吓阿爺，希望得到更多的話，呢樣嘢肯定就係憨居。
跟住衍生的問題就係，既然佔中運動嚇唔到阿爺，甚至激發阿爺更加強硬的回應，點解佢哋仲要繼續搞下去呢？現時看來個局就係咁啦，香港人覺得冇咩嘢，想佢哋快快手搞掂，佔完中生活回復正常，但阿爺就覺得好有嘢，唔係覺得咁快會散場，而係覺得未來幾個月不斷佔中，不斷嚟，繼續高規格回應，唉，只能用適得其反，四個字來形容啦，令人擔心佢哋愈搞，香港的空間就愈收愈窄。
Ariel
** 博客文章文責自負,不代表本公司立場 **
