學聯及學民思潮等學生組織發動9.22罷課一週,「保普選反佔中大聯盟」馬上還擊,宣布設立情報熱線,如果收到該校兩個獨立情報,話人有在校內發動罷課,將會向該校及教育局通報,並公開資料。
教協立法會議員葉建源就譴責大聯盟設立熱線,指他們製造白色恐怖,以極端手法,逼使學校內部壓制學生。
人大常委會落閘,態度之強硬有少少出乎佔中運動組織者意料之外,但話咗要佔中,只能繼續搞,話咗要罷課,亦係唔罷唔得。但那邊廂大聯盟又撐到行,唔再似國教事件時那樣,任由反對派進攻,另一邊任打唔還手,搞到好易被人KO。建制派由任打唔還手,變成受一招打番一招轉頭,好似打拳咁,下下搏拳,打得幾打,兩邊都會口腫面腫,鼻血長流。
以罷課嚟計,兩邊都惡,學校、特別係校長變成磨心。Ariel同幾個中學校長傾過,佢地話當然有政府中人遊說佢地唔好支持學生罷課,但係佢地都好小心,因為左死、右亦會死。若露出支持學生罷課的態度,佢地唔係怕中聯辦或者教育局鬧,而係怕俾家長鬧。識得去罷課,都係高年級學生,例如中五、中六,但佢地年近考DSE,家長重視考試重視到不得了,你學校支持鼓勵學生唔上一個星期堂,學生成績差咗點計? 所以學校唔可以露出支持罷課的態度。
但話番轉頭,若校長發表反對罷課的言論,一樣死,隨時俾某些報紙放上頭版玩,所以點敢壓制學生,校長咁勇做乜? 估計校長大多會講吓尊重學生決定之類的說話,但問心就不支持居多,怕搞亂校內秩序。而家好多Band 2 、Band 3學校,到中五、六有一班學生實質上已自我放棄咗,佢地上堂瞓覺千祈唔好叫醒佢地,否則恐怕會打罵老師,若然呢種學生全班話罷課,走晒去操場,到時都唔知點算。有校長話,希望呢啲學生無睇報紙,唔知有罷課呢回事啦。
Ariel
** 博客文章文責自負,不代表本公司立場 **