溫和派何不行動?

立法會27名泛民議員中，除了最激進的4人，23名泛民議員，表明集體杯葛港府第二階段政改諮詢，有些關心政局的人都感到心灰，認為普選方案通過無望，即是2017年又會原地踏步。

今日來自泛民的陳莊勤在明報寫咗篇長文，提到一位泛民政黨核心成員向他表示，留意到他的觀點，認為他點講都得，因為不用參與選舉。泛民中人估計普選方案必然係保守，但泛民中人也知道若普選特首的政改方案被否決同樣是很難接受的，所以泛民圈中流傳，最好民主黨好似上次咁支持政府的方案，俾其他政黨可以在選舉時攻擊它。陳莊勤認為從呢D傳聞，可見2017普選問題上，泛民各黨派各有算盤。

佢舉咗緬甸反對派領袖昂山素姬獲選議員後，為了順利進入國會繼續推動民主發展，願意妥協，按軍政府要求宣誓「捍衛」一部她畢生反對的獨裁憲法。佢認為昂山素姬「在堅守民主原則的同時也顧及和尊重政治現實。」陳莊勤認為，係時候溫和泛民應綑綁在一起，離開被激進力量攻擊的comfort zone(安全地帶)，理性務實審議2017的政改方案。

Ariel都好同意這種觀點，溫和派何不一起行動，為香港普選爭一個未來，而不是只為自己唔好失票，否決政改方案，任由政制原地踏步。

Ariel

** 博客文章文責自負,不代表本公司立場 **

學民思潮正醞釀中學生罷課，反佔中大聯盟則設立舉報罷課學生熱綫，觸發批評。今日到行政會議成員李國章開口發功，話未滿18歲學生是小朋友，要與父母商量。佢仲苦口婆心地講，罷課影響學習，傷害唔到人大、傷害唔到政府、只係傷害到自己。但佢亦認為反佔中大聯盟的熱綫不能凝聚社會共識。

阿瑟王係行政會議成員，佢當然唔會講同政府立場相反的的事情，佢雖然唔贊成罷課，但同反佔中大聯盟比較，就唔採取惡死策略，用「為學生好」的取態，比較有point。即使佔中派不贊成他，也比較難大力攻擊他。

阿瑟王係聰明人，知道風頭火勢，講嘢落藥，都要恰到好處，否則好易惹火燒身。聽完阿瑟王講嘢，真係有啲懷念佢做中大校長的日子。

講番大聯盟呢條熱線，真係搵機會轉轉好啲，無謂授人以柄，本來罷課發動者要解答家長的質疑，而家調番轉頭，大聯盟因為條熱線就做了主角，俾人質疑，有啲得不償失囉。