大輝哥奇貨可居

自由黨黨魁田北俊近日好高調，除了和細佬田北辰一起接受汪明荃訪問外，田少又接受報章訪問，話有意在今屆立法會任期完結後正式退下，如果工業界議員林大輝願意入黨，他希望將自由黨黨魁職位及其立法會新界東的議席，交予林大輝。

呢單嘢Ariel早前寫過，終於由田少親口證實。林大輝今日和傳媒茶聚時就回應表示，未考慮相關建議，要視乎政改是否通過，如政改被否決，他會感到意興闌珊，要思考是否再參選。

政圈高人話，田少呢一著招兵買馬相當高，先拉大輝，又想執埋謝偉俊入黨，若然兩個都拉到，自由黨又回復大黨身份，即使未拉到，都擺出一個招兵買馬的陣勢，唔打得都睇得。

睇阿大輝哥的答案，話「未考慮」，唔至於關晒門，但又唔見得馬上落叠。現時好像他那樣有一定活動能力的議員，奇貨可居，當然唔心急入自由黨，睇到好盤慢慢食都未遲。至於話政改方案唔通過，大輝哥可能唔選，信住一成先啦。

講番田大少，佢接受汪阿姐訪問時，被阿姐問到佢選唔選特首，佢借阿姐過橋，話佢同阿姐同齡，到2017時都70，又問阿姐做乜自己唔選之類，搞到好熱鬧，但係佢自己就無講一句「我一定唔選」。而家香港，似乎人人都選特首喎。

Ariel

** 博客文章文責自負,不代表本公司立場 **

政府政改諮詢內容再放風出街，話研究2016年的立法會直選，由5個選區改做9個選區，改變政黨林立的局面，若然成事都係大變。 人大常委會早前話明2016年年立會選舉辦法不可大變，不用修改《基本法》附件二，但並不等如不可小變，例如重劃選區就是這類變化，只需修改本地立法，即是立法會過半數通過即可改動。

現在立法會直選只有5個大選區，以多議席單票制進行，實際上係比例代表制，一些大區有5、6個位，最後排第5、6位出線的全是小黨代表，攞到2、3萬票都可以當選，咁就令立法會內出現好多不同聲音。若5區變9區，議席總數不變，投票方式不變，每區議席減近半數，得番3、4個位，小黨無咁易選得上，必然令大黨著數，小黨不利。

若然變9區成事，對民建聯、工聯會、民主黨、公民黨有利，一眾無論建制也好、泛民也好的小黨失利。難怪除了泛民之外，自由黨田大少和新民黨田二少也大表反對。不過若問市民，議會內少一點細黨的吵聲，可能都有不少人支持。

政府建議另一個改動是將超級區議會由5席變成6席，即是另一席本來由區議員互選立法會議員的議席，也變埋超級區議會，估計影響不太大，泛民和建制和有支持者，估計6席也是五五分。