政事
最近睇到一份西報，講到美國華盛頓在本港政改問題上，向北京退讓。報道話華府在本港政改問題上，採取低調立場，認為中美兩國有更重要的事情要處理。
報道引起消息話，最近美國國家安全顧問蘇珊賴斯訪問北京時，同國家主席習近平等中方官員會面時，有談及本港問題，雖然美國消息曾經形容，賴斯見習近平時提過政改，但消息話呢啲只係「旁枝」事件（side issue）喎，兩國仲有好多問題要處理。
報道又話消息指出，華府了解到人大常委會有權決定本港2017年特首選舉安排，消息雖然「大家對這事情有不同詮釋，但香港是中國一部分，中國是有權利向香港行使權力。」
西報引述的消息，聞說來自接近美國消息人士，睇嚟現時情況都好清楚，美國對本港政改立場相當柔軟，主要係想中國協助佢解決在伊拉克同敘利亞的伊斯蘭國（IS）問題。
看來各方訊息都證實緊，美國唔會就本港政改向中國擺硬，更不會為此同中國反面，睇嚟香港的泛民喺爭取普選的路途上，將會失去一個重大的外國力量支持。
Ariel
** 博客文章文責自負,不代表本公司立場 **
自由黨黨魁田北俊近日好高調，除了和細佬田北辰一起接受汪明荃訪問外，田少又接受報章訪問，話有意在今屆立法會任期完結後正式退下，如果工業界議員林大輝願意入黨，他希望將自由黨黨魁職位及其立法會新界東的議席，交予林大輝。
呢單嘢Ariel早前寫過，終於由田少親口證實。林大輝今日和傳媒茶聚時就回應表示，未考慮相關建議，要視乎政改是否通過，如政改被否決，他會感到意興闌珊，要思考是否再參選。
政圈高人話，田少呢一著招兵買馬相當高，先拉大輝，又想執埋謝偉俊入黨，若然兩個都拉到，自由黨又回復大黨身份，即使未拉到，都擺出一個招兵買馬的陣勢，唔打得都睇得。
睇阿大輝哥的答案，話「未考慮」，唔至於關晒門，但又唔見得馬上落叠。現時好像他那樣有一定活動能力的議員，奇貨可居，當然唔心急入自由黨，睇到好盤慢慢食都未遲。至於話政改方案唔通過，大輝哥可能唔選，信住一成先啦。
講番田大少，佢接受汪阿姐訪問時，被阿姐問到佢選唔選特首，佢借阿姐過橋，話佢同阿姐同齡，到2017時都70，又問阿姐做乜自己唔選之類，搞到好熱鬧，但係佢自己就無講一句「我一定唔選」。而家香港，似乎人人都選特首喎。
