提早收工

佔中遍地開花，金鐘同中環一帶最多人群聚集，政局緊張，連帶人的神經都可能緊張啲。

下午傳出金鐘道政府合署發出內部電郵，要求整幢大廈的員工撤走，聲稱為了安全理由，所有員工要立即放工，更於電郵表明若果明天有大型暴動（riot）就不用上班。有政府合署員工仲透露，有行政主任逐間房敲門，叫員工離開，並稱氣氛緊張，又叫其他人不要再回寫字樓，不少員工大感意外。

 

消息令氣氛變得緊張，Ariel四圍八吓，有在金鐘返工的公務員話，係有建議政府部門在可行的情況，俾員工在六點前收工，主要係估計放工時間，會有大量市民去金鐘、中環一帶參加佔中集會，提早收工，避開吓人潮啫。

除咗打政府工，部分在中環、金鐘的私人公司，都有類似的建議，更有一些無須一定返到辦公室開工的老友話，佢哋呢幾日選擇在屋企工作。

金鐘政總被圍，內部有建議在度返工的職員盡量用中環的地鐵站出入，口痕友話行多兩步當減肥無所謂，問題係唔知點收科先至煩啫。

Ariel

** 博客文章文責自負,不代表本公司立場 **

銅鑼灣崇光外搞了佔中，一段軒尼斯道封晒路，真係好少見到條街咁靜，唔止遊客少，人都唔太多，見到啲金舖、珠寶店拍晒大烏蝿。

有幾個做零售生意的朋友問起Ariel，搞到咁田地，阿爺十一國慶會唔會唔俾人嚟香港。Ariel搵消息人士索吓料，佢話阿爺唔會咁做，因為做唔到，國慶假的來港簽證一早批晒，唔係話收就收。

不過消息人士評估，國慶假來港的大陸旅客會顯著減少，因為香港佔中、特別佔據埋銅鑼灣、旺角等遊客區的消息已在內地擴散，旅客會擔心嚟到香港遇上示威動彈不得，交通不便。另外內地客比較怕亂，知道香港射催淚彈都會有啲驚，兩個因素夾埋，內地客減少都係必然現象。

做零售生意的朋友就牙痛咁聲，話今年生意本來都唔好，想靠國慶假追數，如今睇嚟，都係凍過水啦。