提早收工

佔中遍地開花，金鐘同中環一帶最多人群聚集，政局緊張，連帶人的神經都可能緊張啲。

下午傳出金鐘道政府合署發出內部電郵，要求整幢大廈的員工撤走，聲稱為了安全理由，所有員工要立即放工，更於電郵表明若果明天有大型暴動（riot）就不用上班。有政府合署員工仲透露，有行政主任逐間房敲門，叫員工離開，並稱氣氛緊張，又叫其他人不要再回寫字樓，不少員工大感意外。

 

消息令氣氛變得緊張，Ariel四圍八吓，有在金鐘返工的公務員話，係有建議政府部門在可行的情況，俾員工在六點前收工，主要係估計放工時間，會有大量市民去金鐘、中環一帶參加佔中集會，提早收工，避開吓人潮啫。

除咗打政府工，部分在中環、金鐘的私人公司，都有類似的建議，更有一些無須一定返到辦公室開工的老友話，佢哋呢幾日選擇在屋企工作。

金鐘政總被圍，內部有建議在度返工的職員盡量用中環的地鐵站出入，口痕友話行多兩步當減肥無所謂，問題係唔知點收科先至煩啫。

Ariel

** 博客文章文責自負,不代表本公司立場 **

佔中啟動一天，今早金鐘和旺角一帶還有大批示威者聚集，令上班上學出現大混亂。

Ariel聽到最多投訴的不是上班者，而是家長，他們十分擔心子女上學時出事，即使改搭其他交通工具避開示威區，萬一示威者轉移塞路，子女坐在巴士上，困在路面，很擔心他們出問題。很多家長在Whatsapp 群組上表現得十分惶恐，但自己又要上班，照顧不到子女上學，非常無奈。

雖然話佔中講了這麼長時間，一成事必定是這種結局，但殺到埋身時，仍然估不到會咁亂，估不到真正會對安全產生憂慮，估不到會如此影響日常生活。香港突然由一個安全城市，變成一個不安全的地方，轉變之快，令人吃驚。Ariel聽到很多人問:香港點解會變成咁? 相信會有愈來愈多聲音，希望恢復秩序。