政事
學聯周永康呢期做咗新聞人物，昨日喺電視上出咗位。
在直播的對話中，周永康更動之以情，話學生罷課達一個月，「食咗好多胡椒噴霧、八十七枚催淚彈、捱警棍，和平抗爭但頭破血流」。仲話「佔旺」街頭遇到一名年輕學生向他表示「行得出來旺角，預咗中子彈」，令他感到悲涼咁話。
學生對話時表現平和，但傾完返到金鐘總部，仍然係企硬唔接受政府抛的方案，繼續抗爭。學生走上街有自己的理念，但受佔領的影響的市民就唔係人人接受，呢兩日網上傳緊一條手機影片，片中周永康被市民指罵，聽見有一男一女的聲音唔滿佢哋佔領道路，其中個女士鬧到好激動，講埋粗口，言談間估佢主要因為佔中影響交通。
佔領行動已近一個月，雙方對話完，立場唔似有鬆到，睇唔到解決方向，支持同反對佔領的陣型就愈走愈遠，社會撕裂咗真係有排補。
Ariel
** 博客文章文責自負,不代表本公司立場 **
政府同學聯的對話結束，表面上氣氛不致太差，對話之中政府提出兩大妥協方案，包括設立多方平台討論政改，以及就香港民情提交報告，但係結果學聯無鳴金收兵，指政府的方案係「虛招」。
今早見到人民日報海外版報導此事，批評學聯，特別針對佢哋堅持公民提名的訴求，話中央無可能接受，值得注意係報導中再提及，呢場運動係香港版的顏色革命咁話。
值得注意係顏色革命的說法，先係官方媒體出現，繼而在中央高層出訪歐洲時，先係副總理汪洋的口中提出，雖然總理李克強提及香港的運動時，無提顏色革命四個字，但係相信副總理汪洋作為政治局委員，都唔會咁隨意去講「顏色革命」四個字啩？
Ariel收到風，中共係政治局的層面，已將香港的佔中運動定性為顏色革命，所以無論係高官或者媒體出來講，都係引述緊官方版的立場，大家要注意，中國好講究，對一啲問題的基本定性，定性後所有相關處理，都係按定性去規劃，所以將佔中定性為顏色革命，背後有外國參與，最後可能導引至一個比較強硬的處理方式，大家要小心啦。
