佔領行動發展到今時今日，支持同反對佔領的人矛盾愈來愈明顯，除咗肢體衝突，互相指罵，就連直播節目一樣有火花。
話說星期三，蘋果的李慧玲喺金鐘佔領區，同民主黨前主席李柱銘、學聯常委梁麗幗做緊節目，突然一名男子行近打斷眾人。佢話民主保障每個人基本權利，要講出大多數人反對佔中的聲音。
各人想叫佢等一等再講，點知佢唔收口，仲舉高雙手繼續講，佢話香港只有少數人支持佔中，佔領人士的行動，影響到好多人，咁做反而最唔民主。
李慧玲叫佢向政府提議，搞返個公投，睇吓民意係點。呢位男士就引用佔中和反佔中陣營的公投同簽名行動，話有七十幾萬人支持，但有九十幾萬人反對佔中。
李柱銘笑笑口話，九十幾萬人中有幾多係收咗錢？個男人即刻話唔可以咁講，仲轉用英文話︰「That is the only data available.（這是唯一有的數據）。」仲引用美國國防部顧問的白邦瑞，接受訪問時大爆美國有份推動香動民主運動，仲提供過數以百萬美元資金。呢單嘢Ariel 早幾日都講過。
David Lau 劉伯偉（網上圖片）
講咗一輪，李大狀忍不住同呢位男士講，話佢打擾節目進行又係唔係民主，一直舉起雙手的男士就答︰「人地返緊工，你地就霸住條路，咁咪一樣唔民主！」
有人幫男士起底，話佢叫David Lau劉伯偉，喺摩根大通做中國企業融資部主管，佢咁夠膽走入敵方陣營高談闊論，睇怕日後會愈來愈多人咁做囉！
Ariel
** 博客文章文責自負,不代表本公司立場 **
早前在政府同學聯對話前夕，特首CY接受外國媒體的訪問，當中提到提名委員會「有廣泛代表性」的問題，係主要避免向月入1800元美金收入的階層傾斜。呢個說法，後來被好人批評，指佢要排斥低收入人士的選舉權利。
同熟悉政府的政界人士傾，佢哋都覺得特首的講法有啲問題，雖然唔會好似羅致光咁樣形容為「古靈精怪」，但係都同意特首咁講，好容易惹人誤解。
或者我哋睇睇佢當日點講：
梁振英說，若「你去看『廣泛代表性』的意思，這不是以數字來衡他說：「你要盡量照顧香港各階層，若這完全是數字遊戲，由多數人決定，你一定會爭取月入低於1800美元那半數香港人的支持。」
他續道：「這樣，你最後的政治政策，亦會傾斜到這部份人。」
政界人士話當日CY主要係想解釋，提委會點解要有四大界別，平衡各界別的利益，是為了避免一進行普選政策馬上急速向基層傾斜，如果咁就會造成好大的衝突，可能令經濟停滯不前，佢主要想講呢個理論，但係壞就壞在講出1800美元收入呢個數字。政界人士認為，如果CY唔講居民收入劃分的數字，只係講道理，可能令人比較容易接受。
簡單講就係政策要平衡唔同利益，不過一講數字，就變成大家會對號入座，成個制度的設計就好似排斥這些月入1800美金，大約14000港幣的人。政界人士話CY做人從來都係比較嚴肅，鐘意講數字，但係呢件事上，講得咁具體反而就「瀬」咗嘢啦。
有啲人話係CY係在林鄭同學生對話之前，專登講呢啲嘢搞衰個局，呢啲陰謀論有啲過火，其實CY都應該想對話可以成功，氣氛可以緩和，方便學生退場，無理由特登搞局，令對話失敗。
其實CY那天見外國媒體的重點，唔係講1800美金的人選舉權的問題，重點可能想講外國勢力參與佔中運動，借外國媒體表達呢個立場，可惜係在低收入人士的選舉權問題上，講得過火，變成引起新的爭議。
