新華社錯稿尋因

新華社昨日發生一宗「錯稿」事件，搞到香港富豪圈大震動。起因係新華社昨日近中午發了一篇英文稿，點名指多名香港富豪，雖然早前上過京見過習主席，但至今未對「佔中」表態。後來有關文章被刪除，到晩上9時許，新華社再出了新稿件，列舉香港商界多位知名人士和商會發表反佔中的言論，用這篇新稿件取代了原有批評富豪的英文稿。

新華社呢個錯稿事件相當離奇。早前發出英文稿件，署名作者Yan Hao，事後Ariel追查事件起因，官方版本是「一個傻仔記者傻傻地出咗那段稿」，所以移除兼換稿，新稿從正面講番件事。

但段英文稿出街後，昨日下午已在政商界瘋傳。有富豪的助手WhatsApp問Ariel，知唔知發生乜事，Ariel告知那個「傻仔出稿」的版本。那個富豪助手後來話，佢老細唔信係錯稿，認為係有意佈局。

若然係有意，亦可以有兩種情況，第一種係「佛洛伊德口誤」，即係口快快講咗真心話。第二種仲厲害，佈一個局放一條「錯稿」出街，傳出訊息後，話對唔住搞錯咗收番，實情係點「你懂的」。

無論真相係點，條「錯稿」出街後，已產生一個客觀效果，富豪們要打醒十二分精神做人了。如今的世代，似乎和上一任領導不一樣了。

Ariel

** 博客文章文責自負,不代表本公司立場 **

佔領運動今晚起在佔領區舉行廣場公投，學聯秘書長周永康又叫泛民搞五區議員請辭變相公投。泛民有接波的姿態。

泛民飯盒會召集人梁家傑話，由立法會議員辭職引發全民投票的建議，一直有在泛民飯盒會中討論，若能推動民主運動，泛民不排除會發動議員辭職，搞變相公投，但要考慮時間如何配合和引發出的效果有多大。

Ariel 向政壇高人問呢個問題，佢話要留意兩方面，第一，是上次五區公投後政府已改例，辭職的議員不能在補選中參選，以杜絕人玩辭職公投，若泛民議員辭職搞公投，他們不能參加補選，只能做旁觀者。

第二，公投花費一億五千萬，市民是否同意泛民咁搞令人存疑，若然大多數市民反對，建制派大條道理否決撥款，到時無錢搞補選，議席只能從缺，所以無撥款根本無得投，唔係話搞就可以搞。