政事
特首CY晚上更新網誌，講到佢參加了慈善足球邀請賽特首盃總決賽慶功宴，佢話參選特首以來，一直大力提倡體育，盛事化、精英化同埋普及化，呢所謂「三化」，上任以來，從規劃、撥地、撥款等方面，具體支持本地體育發展。
CY仲話今屆政府不計地價拍板興建的體育城，建築費便超過200億港元，足證本屆政府對體育的承擔和決心。
Ariel見到網上有條片，應該係慶功宴上，CY同參與的機構、球員、足球前輩閒談的情況，最有趣的地方係，CY喺講話中，提到自己細路時睇波，捧的隊伍唔係著名的南華，在甲組比賽中捧的係「警察」(係當時本港一支老牌足球隊)，仲數得出當年隊中的名將。睇嚟佢都似係球迷，不過，呢個時候公開講自己捧警察隊，似乎有曲線挺警的味道囉。
Ariel
** 博客文章文責自負,不代表本公司立場 **
昨晚藍絲帶集會上，出現咗與會人士襲擊記者的事件，無綫同港台的記者都中招。
事後無論新聞機構本身，以及新聞組織都有發聲明，譴責事件，主辦機構負責人亦話譴責暴力襲擊記者的人士，又說無論持任何立場，都不應使用暴力，日後考慮在活動增加糾察數目。政府和警方都係譴責暴力，同埋話會徹查。咁樣打人肯定唔啱，警方要公正調查，秉公處理。
事件較特別係，港台事後發聲明，經過諮詢副廣播處長的意見，為保障記者採訪安全，即時起暫停採訪「藍絲帶」所有活動。
這件事在業界惹起爭議，分成兩種意見，支持港台行動的人覺得咁樣打記者，非常錯，既然你唔歡迎記者採訪你的活動，記者杯葛你都好正常。同埋作為傳媒主管，記者出席活動，人身安全受到威脅，主管無法保障，的確唔應該派記者去採訪。
不過，亦有即使係支持佔中的新聞從業員，都對港台的行動有保留，主要原因係記者或者新聞機構是否應該杯葛採訪活動呢？在此事上，與會人士打記者肯定係唔啱，仲俾鏡頭拍晒，可以報警處理，但以後唔採訪呢個組織的活動，客觀上係剝奪了自己受眾的知情權，即係話呢個組織以後搞的活動，做的事情，自己的受眾就唔知道啦，咁係咪一個理想的做法呢？
無論如何，喺香港呢個大時代，各方人等都好衝動，做出好多平時唔會做的事情，可能大家最需要係兩個字：冷靜。
