佔中運動搞的廣場公投，上周嗱嗱臨話搞，跟住去到星期日，就突然死亡，從搞公投意念開始到死亡，大家都被佢搞到眼花撩亂，唔知發生咩事。Ariel嘗試搵相關人士索吓料，睇吓搞邊科。
話說呢個公投意念發起人，應該主要係佔中三子之一的戴耀廷，佢諗咗之後，搵埋學聯同學民思潮，就將概念醞釀起來，佢哋初期打的如意算盤係咁，搞咗一、兩個相對溫和的公投議題，例如叫民情報告要有效用等等，希望搞出一個網上公投，而呢個網上公投人數最好有二十萬人，足夠地大，然後就攞住呢個籌碼就順手退場。
但呢個只係如意算盤，操作起上來就唔係咁簡單，由戴耀廷到學聯、學民思潮，一齊度呢個意念，到呢樣嘢見光後，周五就發生劇烈變化，一啲比較激進的人士參與討論，覺得本來兩個公投題目，係一種阿媽係女人的建議，無乜用啦，要改得勁啲，例如人大要改變8‧31的決定，又例如要加入公民提名，有番咁激的題材，搞出大量的支持，廣場公投先有意義，在激進人士推吓推吓之下，上周五公投議題就變咗呢兩個相當強硬的題材啦。
成件事搞幾搞就晒質，明眼人都睇到咁搞落去都係一鑊泡，首先在佔領區的群眾，特別係旺角的人群相當反對，覺得搞呢啲公投無意思，6‧22時已搞過呢啲公投，當時已搞過咁大規模，再搞呢啲咁細規模，做乜呢？！另外，想退場的泛民，亦都覺得相當頭痕，本來題材不慍不火仲可以，搞到咁激，立場變得咁僵硬，根本無辦法退場。
而戴耀廷同學聯、學民見街外反應咁差，亦都好擔心，硬著頭皮搞落去，除咗話冇廿萬人投票之外，仲好擔心投票率好低，變成搬石頭砸自己的腳，幾經商議，決定臨時吹雞，結束廣場公投。
成件事由提出、變質到擱置，都顯得有啲兒戲，反映咗由戴耀廷同埋學聯、學民帶領呢場運動，其實當中有相當大的隨意性，可以見到佢哋完全操控唔到參與的人群。雖然最後階段擱置咗公投，但即使喺旁邊睇都為佢哋抹一把汗。
Ariel
** 博客文章文責自負,不代表本公司立場 **
學聯同政府對話後，無借用機會轉身退場，好多人覺得好可惜，有份培訓學聯五子的港大政治系教授陳祖為接受報紙訪問時，亦呼籲學生要利用時機適時退場。
Ariel睇落陳祖為篇訪問，大部份都同意，包括佢講到學生在辯論時，表現出色，本來係一個轉身退場的機會，但當晚學聯態度轉趨強硬，無利用到呢個機會，陳祖為亦提到自己的擔心，由公民抗命變成為公民抗爭，抗爭下去，結果可能好難預料。佢又預計運動有三種結束可能性，第一種係華麗轉身方式；第二種係按設計者原來設計，和平清場；第三種就係武力清場。
佢擔心政府中有些強硬派，唔想和平清場，結果出現流血。呢點就係Ariel唔同意佢講的地方。陳教授仲係停留在派系的分析，認為特區政府中有溫和派和強硬派，強硬派想見到流血，呢個係一個主觀預想，就Ariel所知，現實上唔係咁，特區政府之內縱然係唔同人對問題有唔同睇法，但冇人想件事流血清場，而係想件事和平解決。
現實啲去睇，如果學生同佔中組織者唔宣布和平退場，又或者佢哋宣布退場，但有相當數量參與者唔願意退場，咁政府又點樣和平清場呢？其實整件事，本來係由佔中三子書生式設計下導引出來，佢哋當時的設計係佔領咗道路，到時警方拉人，大家瞓低唔反抗，全部俾佢哋抬走，逼爆監獄，逼爆法庭，用呢個方法來抗爭。
依家好難出現呢個情況，警方唔係冇嘗試清場，但清場時抗爭者激烈地同警方對打，冇人瞓喺度等警方拉，所以第二種可能，好似運動者設想的和平清場，唔發生的原因，就係根本成件事唔係好似設計者在象牙塔裡那樣想像的模式發生。
再對上一個星期五，警方清除障礙物時，旺角亦都差唔多清了場，但係夜晚又復活走出九千人，人數仲多過差人，咁點和平清場呢？
成件事可以見到，好多參與者都係好心，但冇預計到客觀上搞了一場運動出來，依家失控收唔到科，其實係咪辦緊壞事呢？但無論如何都係希望學生聽聽陳祖為教授的勸告，都係進退有時好啲，只有運動參與者宣布和平退場，先可以盡量避免流血發生。
