學聯和學民終於和其他泛民人士組成一個聯盟，話要以此和政府對話。這是泛民一直主催建立的聯盟，想藉此套住學聯、學民，尋求退場之路。但聯盟是否套得住班學生，是一個大問題。
學生代表講話似乎有一定的隨意性，他們說政府官員話有些事情特區政府決定不到，所以要求直接和中央對話，要同總理李克強會面。
高人話，學生一直相信一種派系分析，例如特首梁振英強硬，中央被誤導。又或者中央有不同派系，有溫和派有強硬派。所以他們就想找一些可以讓步的人去對話。這完全是學生一廂情願的想法，他們除了對內地和香港領導層態度的誤判外，亦沒有留意局勢已然大變。
現在中國只有一派：習大大那一派。講硬，誰也不夠他硬，也沒有人可以誤導他。無論他自己或其他中央官員，也不會和香港學生對話。照目前的形勢看，特區政府也沒有過去那麼大意願，和學生對話。
中央已改變策略，不用急著清場。特區政府也無壓力，要借和學生對話盡快解決事件，慢慢就變成一場佔中者的獨腳戲。
學生們可能沒有留意，阿爺出乎所有人的意料之外，二話不說就搣田少政協柴。街頭沒有清場，但阿爺已在四方八面開始清場，包括建制派個場。
Ariel
** 博客文章文責自負,不代表本公司立場 **
佔中運動搞的廣場公投，上周嗱嗱臨話搞，跟住去到星期日，就突然死亡，從搞公投意念開始到死亡，大家都被佢搞到眼花撩亂，唔知發生咩事。Ariel嘗試搵相關人士索吓料，睇吓搞邊科。
話說呢個公投意念發起人，應該主要係佔中三子之一的戴耀廷，佢諗咗之後，搵埋學聯同學民思潮，就將概念醞釀起來，佢哋初期打的如意算盤係咁，搞咗一、兩個相對溫和的公投議題，例如叫民情報告要有效用等等，希望搞出一個網上公投，而呢個網上公投人數最好有二十萬人，足夠地大，然後就攞住呢個籌碼就順手退場。
但呢個只係如意算盤，操作起上來就唔係咁簡單，由戴耀廷到學聯、學民思潮，一齊度呢個意念，到呢樣嘢見光後，周五就發生劇烈變化，一啲比較激進的人士參與討論，覺得本來兩個公投題目，係一種阿媽係女人的建議，無乜用啦，要改得勁啲，例如人大要改變8‧31的決定，又例如要加入公民提名，有番咁激的題材，搞出大量的支持，廣場公投先有意義，在激進人士推吓推吓之下，上周五公投議題就變咗呢兩個相當強硬的題材啦。
成件事搞幾搞就晒質，明眼人都睇到咁搞落去都係一鑊泡，首先在佔領區的群眾，特別係旺角的人群相當反對，覺得搞呢啲公投無意思，6‧22時已搞過呢啲公投，當時已搞過咁大規模，再搞呢啲咁細規模，做乜呢？！另外，想退場的泛民，亦都覺得相當頭痕，本來題材不慍不火仲可以，搞到咁激，立場變得咁僵硬，根本無辦法退場。
而戴耀廷同學聯、學民見街外反應咁差，亦都好擔心，硬著頭皮搞落去，除咗話冇廿萬人投票之外，仲好擔心投票率好低，變成搬石頭砸自己的腳，幾經商議，決定臨時吹雞，結束廣場公投。
成件事由提出、變質到擱置，都顯得有啲兒戲，反映咗由戴耀廷同埋學聯、學民帶領呢場運動，其實當中有相當大的隨意性，可以見到佢哋完全操控唔到參與的人群。雖然最後階段擱置咗公投，但即使喺旁邊睇都為佢哋抹一把汗。
