政治姿態

行政會議成員胡紅玉接受南華早報的訪問，佢無參加最近保普選反佔中大聯盟發動的還路於民的簽名運動，其實呢次已經係胡紅玉第二次無參加反佔中大聯盟的簽名，上之佢哋搞反佔中簽名時，胡紅玉都無簽名。

胡紅玉自己的講法就係，任何這類政治議題的簽名，佢都不會參加，保普選反佔中大聯盟上次的簽名活動上，14位行會非官守議員之中只有兩人沒有參加，一個係林煥光，一個係胡紅玉。今次第二次的簽名活動，暫時知道胡紅玉無簽，唔知道林煥光有無簽。

胡紅玉一直予人感覺係比較泛民，而林煥光採取一個比較中立的形象，所以兩人唔簽名支持還路於民簽名，甚至公開表述佢不支持，絕不令人奇怪。不過，知情人士就話，胡紅玉咁高調公開話自己無簽名支持還路於民，有別於其他的行會成員，似乎似一種政治表態居多，因為在9.28射催淚彈後，隨即係9.30行會上，胡紅玉並無強硬表態反對警方使用催淚彈，反而好有意見者係羅范椒芬，佢唔單止在電台上講到喊，甚至在行會上講到呢件事都有喊。反而胡玉就選擇不發聲。

知情人士就話在現在咁政治化的環境，政府就本應團結一致，包括行政會議非官守成員都應該團結一致，槍口對外好啲，但亦有個別成員相當重視自己的形象同聲譽，所以在是否簽名支持還路於民的運動上，公開表態有時係重要過在會議上的真正態度，因為公開表態讓人睇到，在會議上有無講嘢就無人知，所以在政治的領域中，有時包裝重要過實質的。

Ariel

** 博客文章文責自負,不代表本公司立場 **

行政會議成員葉劉淑儀昨日建議將通識課由必修科改成不必修科，雖然佢話建議同政治形勢無關，但呢個建議本身都好受關注。

當年羅范主政教育的年代，建議取消初中的中史作為必修科，加入咗高中的通識科，同時將通識科列為中、英、數之外的第四科文憑試必須考的科目，呢科如果唔得到2的合格成績，學生無緣進入大學。

通識科由不存在，變成極之重要，搞到學生非常頭痕，因為相對其他科目，呢科標準比較不清晰，好多學生考呢個試都無把握，所以繼中文科後，通識係另一科殺人科目。

葉劉提出呢個建議，雖然被人懷疑係有政治動機，因為咁多學生上街，被指係同通識科教育有關係，但Ariel覺得，葉劉係一個聰明人，睇到呢個建議的市場，因為估計好多學生同埋學生家長都支持取消通識科作為必修科的建議。

呢啲殺人科目係阻礙了一些學生，特別係理科成績好但語文差的學生，獲取入大學的資格，即係話即使你PHY、CHEM、BIO科科都攞5**成績，但通識科就便便考唔到2的水平，你就入唔到大學，有唔少數量的學生，唔係死中文，就係死通識（即使合格率高都唔達標），最後就被逼去外國升學，挨一年4、50萬的學費。又睇睇葉劉點去推取消通識必修的建議。