Jack 最近行尖沙咀的歷史博物館，見到一樓餐廳換咗新裝，細心睇吓，原來係由扶康會成立的社會企業康融服務營辦咗一間「香城茶室」！聽個名就充滿懷舊氣息！
茶室一隅
「香城茶室」啱啱喺十月底開業，以昔日懷舊冰室同埋茶居做主題，仲得到社會福利署「創業展才能」計劃贊助逾180萬元種子基金成立，自負盈虧營運。
茶室請咗十名殘疾人士，佔總員工三分二，佢哋都被分配到唔同崗位，好似廚房、水吧、收銀、侍應同埋清潔。
員工穿起整齊制服工作，有板有眼。
呢間係扶康會第二間喺博物館的社企餐廳，佢哋喺海防博物館亦有間「康姨咖啡室」，主打自家製康姨曲奇。
Jack 搵扶康會朋友傾吓，原來餐飲服務的職業康復訓練，對殘疾人士好有用，因為除咗學到職業技能，佢哋仲有機會接觸到社群，學習點樣同人面對面溝通，對佢哋日後投身社會好有幫助。
好多人講到社企，仍然會覺得係慈善機構開善堂做善事，查實全港有四百五十多間社企，社企都係一盤生意，只係並非想搵大錢，佢哋係想達致某種社會目的，例如提供社會需要的服務或產品、為弱勢社羣創造就業和培訓、保護環境等等。
社企賺到的錢，通常都用返嚟繼續投資，唔會派返俾股東。
政府早前委託中大同社聯，就社企營運做咗個研究，發現約六成受訪社企在前年都做到收支平衡甚至有錢賺。
茶室充滿懷舊氣息。
但目前一啲社企，都出現前線人手短缺，以及培訓不足等人力資源問題，中大同社聯的研究就建議政府，考慮提供種子基金，資助建立一個甚至多個支援平台，幫社企請人同做培訓。
仍然有唔少人認為社企無咩效率，只係扶貧措施，但舊年另一項研究發現，政府每投放一蚊支持社企發展，就換到四至七蚊弱勢社群的就業工資，顯示社企真係能夠創造高社會效益。
社企諗頭愈來愈多，充分利用社會資源，同不同界別人士同團體跨界別合作，提供服務同產品滿足社會需求之餘，亦開拓出新道路。幫到人又幫到自己，希望大家都多啲支持社會企業啦！
Jack
** 博客文章文責自負,不代表本公司立場 **
打開 facebook，「洗版」都是「佔中」消息，其中一條引起Jack注意。靚媽 Joyce 留言說︰「囝囝喺幼稚園上堂，老師分享時事講到佔中，話警察用催淚彈打啲學生，所以警察係壞人！」 Joyce 話好擔心囝囝「學壞」，唔係驚佢行差踏錯，而係擔心佢真係將警察當壞人！
再睇吓facebook，原來同類遭遇的小朋友有唔少，有朋友打算向學校反映，就算今次警方行動有幾唔啱，都唔應該教呢班只有四、五歲的小朋友「警察是壞人」。
資料
一向大情大性的邦邦媽最激動︰「如果警察是壞人，那麼樓上有人掉嘢落街，點解學生要搵警察？佢哋可以自行解決啦！」
警方施放催淚彈嗰一幕，的確令好多人心痛，亦令社交網站上出現針對警察的言論，Jack 有位有份參與佔中的朋友私下講，如果無呢一幕，未必會有咁多人行出嚟，局面未至於變成咁。
但作為老師嘅，又係咪應該教小朋友「警察叔叔係壞人」呢？
資料
Jack 的朋友 Stella 係幼稚園教師，佢話聽到好多朋友都對警察有怨言，但絕對唔贊成教師將呢啲意見帶入課室︰「讀幼稚園的小朋友年紀仲好細，係一張白紙，未識分辨是非黑白，道德價值觀建立好依靠大人。」
Stella 話社會上有角色定位，警察的職責係維護社會秩序、治安，全世界都係咁，如果貿貿然改變小朋友對警察的印象，後果可以好嚴重。
「究竟有幾嚴重？」Jack 最鐘意打爛沙盤問到篤，「如果小朋友聽大人講，斷定警察係壞人，佢哋好可能唔再認為要聽警察指令，甚至法例，佢哋會認為唔需要守法，甚至daddy mammy 老師的命令唔駛聽，最極端可能引致反社會行為。」Stella話。
資料
譚Sir 係退休教師，佢都同Jack 講呢位老師做法唔多妥，話幼稚園小朋友唔能夠理解呢啲道德議題，反而小學、中學就可以討論，但應該討論警察的行為是對、是錯？而不是整體地批評警察這個職業。
譚Sir話家長都可以同仔女傾吓「佔中」，但唔一定要強加自己諗法喺子女身上，畢竟民望的真諦就係要尊重每個人都有獨立思考的能力，尤其是不同傳媒或網頁傳來的資訊，都無法係事實的全部，家長應該提供框架，按照子女的能力好好討論和思考。
警察曾經係好多人夢寐以求的職業，勢估唔到會變成咁！呢類政治議題睇怕有排傾，似乎做家長都應該諗定辦法，點同子女討論囉！
