恒大借新傳媒涉足媒體市場

內地大型地產發展商恒大集團睇中娛樂大亨楊受成旗下的新傳媒，提出以9.5億元，收購75%股權，楊受成將會購回新傳媒旗下媒體及出版業務10%股權及九龍灣鴻圖道一個物業，換言之，楊受成仍保持新傳媒出版業務小股東的地位，不會完全退出有關業務，或者做吓「教車師傅」，教吓恒大老闆許家印點樣做媒體。

新傳媒現時出版的雜誌，包括《東方新地》、《新假期》、《NM+新Monday》、《流行新姿》以及《經濟一周》，但《新報》則由楊受成私人持有，不包括在是次交易之內。

新傳媒做雜誌好成功，旗下最大的雜誌是娛樂《東方新地》，挑戰最大娛樂雜誌、壹傳媒的《忽然一週》的地位。呢個交易作價9.5億買新傳媒75%，即係100%股權作價12.7億，睇落價錢好好。新傳媒停牌前只有4.1億市值，恒大收購價比停牌前股價有208%溢價，若最後收購落實，小股東發咯。

如今雜誌整體難做，新傳媒亦受影響，至今年6月底的年度廣告收入跌咗2730萬，得番3.6億，集團年度純利跌咗一半至1106萬元。新傳媒停牌前市值4.1億，市盈率已高達36.5倍，若然以12.7億元收購價計，市盈率高達114.5倍，你話貴唔貴? 恒大許家印出到呢啲價錢去買，難怪楊老闆心動想沽。

不過財經界人士話，作價雖然貴，但買家唔出到呢啲價錢，傳媒老細又唔會沽，因為做傳媒大亨好過癮，有強勁的報紙甚至雜誌在手，行出來人人都要俾番兩分薄面，呢啲界外價值，好難用錢去計。加上而家想借殼上市，要買隻主板上市公司的殼，都要4.2至4.5億淨殼價，恒大收購價減咗殼價，等如用8.2億作價買新傳媒100%的雜誌業務，雖然都係好價，但睇落無咁離譜。

佢話許家印借咗個香港傳媒殼，有兩條路，一係在內地買媒體注入香港上市公司內，一係就全力在香港搞媒體，正路係前者機會大少少，因為內地市場大，許家印又到處搞新生意玩多元化，玩內地媒體容易開多一瓣大生意。當然，如果許老闆在香港買張報紙嚟玩吓，又係大件事囉。

Ariel

** 博客文章文責自負,不代表本公司立場 **

學聯終於敲定明日(周六)上京，由秘書長周永康、常務秘書鍾耀華及常委羅冠聰三人做代表，副秘書長岑敖暉則會留港，上京三人組認為北京之行有必要，希望向總理李克強及人大常委會表達政改的訴求。事先講明會坐明天下午的航班，仲會帶埋「我要真普選」的標語上京。睇嚟三人組都係大鑼大鼓咁去喎。

熟悉內地情況的高人分析，學聯上京有幾種結果，據聞一直有中間人同學聯溝通，依家仲有一日時間，睇吓中間人能否勸退學聯上京之行；二係在香港辦理登機手續時，證件有問題，例如回鄉證有無效，如果有不受歡迎名單，航空公司有可能收到通知的，即係上唔到機；三係上咗機後，在北京禁區被拒入境，原機返回。

高人認為學聯應該接收到中間人的信息，上京唔會有咩結果，亦無助解決目前的局面，亦無可能見到李總理或者其他官員，但學聯仍然堅持北京之行，這樣在阿爺眼中就有做「騷」之嫌，所以官員唔會陪佢哋「玩」。

學聯揀咗周六上京，都好聰明，周未靜靜哋，佔中運動又膠著狀態，三子上京都應該吸引到唔少注意力架。