維基哥話睇通勝揀開台日

港視開台日揀正11月19日，與TVB台慶日撞到應一應，人人都認定維基哥挑機無記，但他佢接受雜誌訪問時卻聲稱：「揀嗰日係因為睇《通勝》，指當日宜開市，更係今年幾個好日子中嘅其中一個，後尾先知同TVB台慶撞日子。」 

維基哥仲話就撞期考慮了一段時間，但後來覺得「開台」和「台慶」無關，所以去馬咁話。

Ariel睇完維基哥的解釋，都係信住一成先。佢係marketing高手，想當年一招「殺價超人」，打到香港電訊一仆一碌。雖然好多招咪過維基哥的4A廣告公司，都話佢好難服待，但維基哥係咁有理念之人，當然係自己嗰套行先，唔聽廣告公司的創意。結果證明，佢當年條殺價橋得喎。

如今港視開台，擺明挑機無線，話揀到人地台慶日係因為《通勝》，可信度唔高，即使真係咁啱揀中，一般人都會揀過另一個日子，維基哥起碼唔怕撞。單係撞日子呢個挑機動作，都好有話題，頂得住一百萬廣告費啦。維基哥咁精打細算，諗過度過，無死錯人架。

話時話無記呢個11月19日開台日，原來係創辦人「六叔」邵逸夫的新曆生日，六叔揀自己生日開台，當然覺得自己夠殺氣，照得起。

不過玄學界對維基哥撞無線開台日啟播，話係高招，係想「食運」咁話。玄學高人舉咗個例子，話有張報紙老細創報之時，專門揀了長實李超人當年在北角一座工廠大廈一個舊辦公室來用，話李超人當年在此發跡，揀同一個辦公地址，就想食超人的旺氣咁話。如今港視揀正無線同一個開台日去開台，又有無食人運勢的好處呢? 又唔知無線有無擺番個陣，邪一邪維基哥?

Ariel

** 博客文章文責自負,不代表本公司立場 **

佔中運動發生以來，很多民調都發現反對佔據的民意佔大多數，唯獨中大傳播與民意調查中心的調查較特別，過去做出來的結果，贊成反對的民意比較接近，所以昨日佢地再公布民調時，亦倍受關注。

結果中大公佈本月初進行的民意調查，亦開始發現民意出現逆轉，支持佔領運動的市民較上月下跌約4個百分點為33.9%；不支持運動的增加8個百分點至43.5%。另外67.4%受訪者認為佔領人士應該現在全面撤離佔領地點，認為不應該的只有13.9%。泛民主派的受訪者之中，亦有近40%認為應該撤離，反對撤離則有約30%，即係泛民支持者都以唔贊成佔領居多。

中大調查的特別之處有兩個，第一是他們的調查包括15至18歲人士，一般調查只訪問18歲以上人士。由於年青人多支持佔領，中大調查增加訪問青少年，結果是比較多人支持佔領。第二是他們將佔領拆兩條問題問，一條問是否支持佔領運動，一條問應否全面撤離佔領地點，而其他調查好多是集中問後者。問是否支持佔領運動一般較多人支持，問是贊成佔據街道(反面問法是應否全面撤離)一般較少人支持。

但即使以中大的調查方式去問，亦見到支持佔領運動的民意逆轉，不支持佔領運動的急升8個百分點至43.5%，支持運動的急跌4個百分點至33.9%。政圈中人形容，連中大調查都見到民意逆轉，今次民意真是逆轉了。