政事
佔領行動激化，泛民不想找數，一直尋求退場方法，但講來講去也講不出一個結果。
早前有泛民中人提議，不如在金鐘搞一個10萬人大集會，然後宣布運動勝利完成，可以退場。不過搞集會有人同意，話宣布退場就無人願意講，建議無疾而終。
法院批出金鐘和旺角的禁制令，泛民應該有個態度。昨日泛民議員飯盒會就傾到旺角佔領區可能在下周清場，可否發聲明叫旺角佔領者離開旺角後返回金鐘，不要再遷移到其他地區擴大佔領。但有公民黨及工黨成員反對不能擴大佔領，最後發聲明一事只能作罷。
泛民中人慨嘆，佔領事件鬧得太耐，又有人有意搞激化，民意開始反轉。學生在佔領之後，拍拍屁股就走，泛民要參與明年區選和後年立法會選舉，明知自己要找數，但偏偏無人願意出來做醜人，唔止唔敢叫人撤，連叫人唔好擴大佔領都唔敢講，咁少事都無共識，真是眼白白睇住自己中槍，無計可想。
ARIEL覺得，泛民也好，學聯學民也好，日日有人出來講嘢，但無一個領袖，結果就好似一班盲頭烏蝿咁，唔係領導運動，係被運動帶著行，真係無眼睇咯。
Ariel
** 博客文章文責自負,不代表本公司立場 **
日前有示威者衝擊立法會打爆玻璃，立會法議員黃毓民昨日對傳媒話與是次衝擊行動亳無關係，「你點屈都屈我唔到，第一我唔喺現場，我事後先知，呢輪我旺角、金鐘都無去，廿幾日嘞，無得屈我」。
黃毓民強調自己與「熱血公民」黃洋達都沒有叫人去衝擊立法會，他說：「就算黃洋達去金鐘，佢都無行埋去，佢喺外圍之嘛，佢知道發生事，喺外圍睇發生乜事之嘛，如果係吹雞，唔係咁做啦！」黃毓民又指，雖然原則上不反對示威者將行動升級，但今次衝擊是「判斷錯誤」和「戇居」，「我都唔鍾意佢哋咁樣做，喺策略上，我覺得時機都唔啱，喺呢個時候，做呢啲做乜？佢地咁做對個運動無幫助。」
這邊廂毓民同衝擊立法會的示威劃清界線，那邊廂警方就拉人。被視為毓民戰友的網絡媒體「本土新聞」總編輯梁錦祥昨日下午被捕。梁錦祥任職的「本土新聞」昨日在facebook發文，指梁錦祥於昨午4時56分發出短訊「I am arrested please spread（我已被捕，請廣泛傳開）」。黃毓民後來話，覺得梁錦祥被捕好離譜，指梁只是在衝突現場採訪。
看來警方會嚴肅對待衝擊立法會大樓事件，不止拉衝擊者，亦會針對涉嫌幕後組織者和當日在網上散佈立法會將通過網絡廿三條假消息的網民。
