專業移除隊

昨日清理亞皆老街路障後，警員與示威者由傍晚開始爆發多輪衝突，引起唔少人關心今日清理彌敦道路障時，會唔會順利。

昨日拖到中午先開始清理障礙物，搞到傍晚先通到車，結果佔領人士同警方在砵蘭街「開戰」。唔知係唔係汲取咗昨日拖得太長的經驗，今日警方好早就介入清理工作。初時陸路交通運輸業大聯盟成員組成的代理人團隊九點半開始清理障礙物，無幾耐同佔領人士發生對罵，執達主任就要求警方介入，十點鬆啲，警方就開始行動，一批「專業移除隊」出動。

 

呢批專業移除隊，即係著藍色衫，戴晒頭盔，又配備咗眼罩，佢哋個個手瓜起展，出手好快，一路向油麻地方向推進，一路有廣播要求聚集人士離開。

到咗十一點再發生衝突，警方帶走多人，之後移除隊一路向前推進就比較順利，到中午已將禁制令範圍內的13個路障全部移除，下午一點幾彌敦道陸續恢復通車，下午三時多，彌敦道南北行三線全部開通。

 

據聞呢批專業移除隊，大部分來自機部隊PTU，Ariel今日睇電視，覺得佢哋唔屬後生，八咗一吓，話當中唔少係PTU教官，平時操到好FIT，而且幾有經驗，平時素有訓練，以前抬人的場面都係由佢哋參與，聽聞佢哋連按穴位都識，有需要時以最有效的手法抬走示威者。佢哋推進時幾強硬吓，一有阻礙，就將人帶走，交由隨後的警員處理，所以推展得好快。

 

今次警方清障同上次最唔同，係即場拉人，預備咗旅遊巴，一遇阻礙就抬走，一路強硬清出馬路，所以清場清得較有效率。

Ariel

** 博客文章文責自負,不代表本公司立場 **

昨日在亞皆老街清除障礙物期間，警方和示威者發生衝突，之後衝突蔓延旺角多條街道，打晒大交，其中較激係砵蘭街同山東街的衝突。

話說昨日傍晚大約六點，警方將示威者從亞皆老街驅離，與他們在砵蘭街發生激烈衝突，在港鐵旺角站E1出口對開，警員先制服多人，其後警員在高台噴射催淚水劑向前推進。到咗八點幾，警方將示威者趕離砵蘭街，部分人就轉戰砵蘭街及彌敦道之間的山東街。

上海街、山東街的衝突片段：

到了午夜十二點左右，雙方在山東街又打起來，警方出動警棍及胡椒噴霧，由電視畫面所見部分被警方沒收的木板鑲了螺絲釘。

之後平靜過一陣，到咗凌晨兩點幾三點，警員稍事休息，示威者趁機將障礙物向前推，警員反推，將示威者推往彌敦道，之後示威者又再次將警方的防線再逼回山東街後。

 

除咗砵蘭街和山東街這兩個大「戰場」，另有示威者在其他街道佔據，和警員在多條街對峙，在警方清咗砵蘭街後，晚上九點點，有示威者轉到上海街、新填街，到咗十點幾，在西九龍走廊旁邊的塘尾道，都有示威者用欄杆、垃圾筒等塞住馬路，同時豉油街、渡船街等都有示威者。

 

睇番成晚的情況，清理亞皆老街後，示威者首先走向砵蘭街，衝突開始離開禁制令範圍，警方指係非法集會，一路向南將示威者驅散，對峙漫延至橫街，山東街、豉油街、長沙街，甚至係新填地街等。

無綫新聞截圖

睇地圖，叫「巷戰」都唔算誇張，警方今次的手法比較強硬，似要清空馬路，通番交通，而且每次推進都預咗拉人，準備埋旅遊巴士拉犯上車，以過往經驗，到咗周未出來的人會多啲，旺角的清場都唔會平靜啦。