包圍政總學生領袖去咗邊

學聯和學民思潮帶領包圍政總，結果搞到政總早上要關閉，學聯秘書長周永康話顯示行動成功，但亦承認有參與者不滿學聯的部署。

昨晚通宵，在政總外警察與示威者多番激烈衝突，電視畫面所見有示威者頭破血流，又有人中咗胡椒噴霧，不過，就唔多覺「雙學」三子周永康、岑敖暉同黃之鋒的蹤影，無好似以往行動咁行喺最頭。

其實由「雙學」尋晚六點開始集會，都只係見到學民思潮黎汶洛同埋學聯常委羅冠聰先行發言，到九點宣布包圍政總，三個鐘頭晚會，有多個團體上台發言，但一直見唔到周永康同岑敖暉。

午夜示威者佔據咗龍和道後，周永康在夏慤道見記者，話市民在整個行動中恪守非暴力原則，並無強行衝擊警方防線，指係警方亂棍打示威者。被問到學聯成員在行動中的角色，佢話有唔同崗位，有啲在前線，有啲係後勤，有啲在金鐘一帶待機，又話當局有意無意放風會拒捕主事者，所以期望行動可以持續落去，所以有內部分工。(周永康詳細解釋可以看以下連結)

http://news.tvb.com/local/547b4d496db28c7810000006/

到早上打完大交後，周永康再強調，大約十名學聯和學民思潮成員參與前線的衝擊，他自己就留在後方。至於早前被捕的岑敖暉和黃之鋒亦不適合在前線，據聞係因為岑敖暉同黃之鋒有案在身，正在保釋期間，所以唔能夠行到最前。

周永康要多番解釋在示威者包圍政總時，學聯主要成員及佢自己的角色，睇嚟包括部份示威者對佢哋做法有睇法喎。

至於黃之鋒，有人話見到佢同學聯梁麗幗，由梁國雄同張超雄的議員助理，帶咗入立法會，到凌晨都未走，令人懷疑佢哋「退居幕後」，將立法會變成指揮部。

據聞建制派收到黃之鋒入咗立法會好不滿，即刻搵主席曾鈺成同秘書處反映，要求趕黃之鋒走。不過曾鈺成話無權下逐客令，要由行管會決定，最快今日開會決定。

Ariel

** 博客文章文責自負,不代表本公司立場 **

支聯會昨晚改選領導層，原主席李卓人退居秘書，民主黨何俊仁任主席，副主席續由蔡耀昌及麥海華出任，兩名「80後」加入做常委。

據說在選主席時，李卓人昨晚推舉何俊仁接棒，鐵頭仁順利當選，李卓人改任秘書，鐵頭仁話李卓人提名他做主席，因為李卓人想集中做工黨的工作，李做工黨主席、職工盟秘書長及支聯會主席，崗位太多，不能兼顧。而李卓人自己就話，並非要淡出支聯會的工作，日後會著力搞好六四紀念館以及海外聯絡。

不過政壇中人認為，早前的電郵爆料事，爆出李卓人收肥佬黎秘密捐款，他後來解釋錢是捐俾組織，只是暫放個人戶口9個月云云，但廉署介入調查，件事睇嚟有手尾。如今他唔做支聯會主席這個咁敏感的職位，似乎是想在政治上減壓。

就在李卓人不做支聯會主席的同時，他昨晚凌晨1時現身龍和道衝突現場，想亮一亮相。

他在龍和道示威前線，大叫「我要真普選」口號。但示威者沒有太當他是領袖，更出現噓聲，部份人冷言冷語，叫他「快啲衝」、「支聯會咁多年淨係識籌錢」。警方開始採取行動時，他就扮演調停者角度，叫示威者「大家唔好衝，大家向後退」，但亦有示威者話「唔衝就返屋企啦」。

在這個沒有領袖的年代，泛民議員都唔易做，左右也不是人。