聯合聲明無失效問題

英國國會下議院就中方拒絕發簽證給外交事務委員會成員來港，舉行緊急會議。委員會主席Richard Ottaway稱，上周有中方官員向他表示，中英聯合聲明有效期至香港九七回歸，現時已失效。

中國駐英大使劉曉明等官員，上周曾和外交事務委員成員見面，估計這是委員會見面後的印象，但未見中方官員有此公開表態。中國就外交事務委員會赴港調查一事態度強硬，相信當日會面都係由頭嗌交嗌到尾，嗌交時雙方觀點係唔係講得咁清，就真係好難講。

Ariel問過了解聯合聲明同基本法起草的知情人士，佢就話按道理聯合聲明不存在失效的問題，中英聯合聲明是中國同英國之間的協議，好似一份合約咁，大家同意97之後，香港回歸中國，而中國就以基本法落實聯合聲明的內容，既然係一份合約，就不存在失效的問題，因為即使在過咗1997年，中英聯絡小組都繼續運作到2000年，唔應話中英聯合聲明到1997年就失效。

佢又話雙方爭議的焦點應該係，英國有冇權監督中國執行基本法、特別係特首如何普選產生。由於中英聯合聲明的重要精神寫入咗基本法內，英方就會覺得有權去監督，但中方就會覺得，基本法雖然落實聯合聲明的精神，但具體執行係中國的內政，不由英國去監督。所以真正爭議唔係聯合聲明有無效，而係英國國會有冇權派代表團來香港監督中國、特別係監督香港2017年如何普選特首。

聯合聲明附件一中講到中國對港政策：「香港特別行政區行政長官在當地通過選舉或協商產生。」聯合聲講明行政長官可以選舉或協商產生，既然協商都得，咁香港2017年如何舉行普選，英國當然係無權過問啦。

睇嚟呢次中英爭議的口水戰，仲會拗一陣，不過，各方都好懷疑英國政府依家同中國的經貿關係咁密切，係咪會好認真同中國過唔去。

Ariel

** 博客文章文責自負,不代表本公司立場 **

「雙學」包圍政總失敗，學民夾硬再搞絕食，佔領運動步向尾聲，佔中三子將在周五自首，聞說幾個泛民大佬都有心理準備要自首或被拉。

 

如今各方都開始為「後佔中」作準備。運動搞咗無耐佔旺佔到失失地控時，幾個泛民大老肥佬黎、李馬丁、陳日君都唔係咁想搞落去，想說服各方停手，後來佔中三子都開始動搖，只有「雙學」堅持唔撤，泛民搞出個五方平台，原本想套住「雙學」叫佢地思考撤退，但呢個平台廢廢地，搞咗等如無搞，「雙學」繼續我行我素，搞極都唔完。

  

佔中三子唔想為運動硬搞下去孭數，所以兩個星期前已經預告要在12月5日(本周五)自首，聞說佢地會在周三或周四開記者會交待詳情，咁做等如宣佈住後的佔領若有死傷，都同他們無關。

  

泛民四大元老係肥佬黎、李馬丁、陳日君和陳四萬，陳四萬運動開始時不在港，之後無積極參與，可以話「唔關我事」，但其餘三老心中有數，怕運動過後，政府會採取拘捕行動。聞說陳日君預備自首，呢位老人家以敢言見稱，恐怕自首時都會再媽政府一頓，話「政府殘忍到不得了」之類。

  

但肥佬黎和李馬丁就唔會自首啦，但佢哋都有準備差人隨時上門。觀乎肥佬黎在旗下刊物係咁公開叫人撤退，佢同律師都度掂咗自辯理據啦。