政事
早前Ariel話亞視又拖糧，昨日(5號)亞視又出咗張通告，話管理層一直為工資事宜奔走籌謀，遺憾未能支付11月份工資。
計一計，周日已係7號，按勞工法例，過咗7日出唔到糧，可能觸犯勞工法。
上次9月份拖咗成20幾日，有員工到勞工處求助，搞到勞工及福利局局長張建宗都要開聲，敦促資方努力解決資金問題，盡快妥善解決。聖誕新年假期即將來臨，咁樣拖糧，員工真係好慘！
聞說主要股東王征到依家仲係堅持，寧願「情願執笠也不賤賣」，加上距離政府決定是否續牌的日子愈來愈近，通訊局已建議唔續牌，咁搞落去，成功賣出續到牌的機會真係愈來愈細囉。
Ariel
** 博客文章文責自負,不代表本公司立場 **
佔中就嚟散場，忽然傳出阿爺唔滿意愛國媒體打仗打得唔夠落力的消息，話要叫《文匯報》另外出一份免費報紙。仲講到似層層，話份新免費報係小報size，每日印10萬份，主打基層讀者咁話。
Ariel搵知情人士求證一下，話聽都未聽過，唔似係真。查實9.28佔中開始之後，阿爺十分緊張，各方人馬都要動員，《文匯報》、《大公報》自然走在最前線。
《文匯報》、《大公報》過去都有少量贈閱，打仗期間，聽聞佢地同英文《中國日報》都加大贈閱數量，所以有人見到在基層公屋地區有《文匯》、《大公》派。唔知係唔係因為咁，就以為《文匯》搞免費報。
在《文匯報》前任社長張國良的年代，的確有諗過搞免費報紙，但最後被阿爺否決咗，阿爺認為愛國報紙在港有宣傳任務，搞免費報太商業化，愛國報紙無謂搞呢啲嘢出來同其他報紙競爭。
如今免費報紙比當年更多，郁吓每張都印40、50萬份，若然《文匯報》搞一份免費報印10萬份，真係如滄海裏面一滴汁，唔知有乜作用，左睇右睇都唔似會搞咯。
