文匯唔會搞免費報

佔中就嚟散場，忽然傳出阿爺唔滿意愛國媒體打仗打得唔夠落力的消息，話要叫《文匯報》另外出一份免費報紙。仲講到似層層，話份新免費報係小報size，每日印10萬份，主打基層讀者咁話。

Ariel搵知情人士求證一下，話聽都未聽過，唔似係真。查實9.28佔中開始之後，阿爺十分緊張，各方人馬都要動員，《文匯報》、《大公報》自然走在最前線。

《文匯報》、《大公報》過去都有少量贈閱，打仗期間，聽聞佢地同英文《中國日報》都加大贈閱數量，所以有人見到在基層公屋地區有《文匯》、《大公》派。唔知係唔係因為咁，就以為《文匯》搞免費報。

在《文匯報》前任社長張國良的年代，的確有諗過搞免費報紙，但最後被阿爺否決咗，阿爺認為愛國報紙在港有宣傳任務，搞免費報太商業化，愛國報紙無謂搞呢啲嘢出來同其他報紙競爭。

如今免費報紙比當年更多，郁吓每張都印40、50萬份，若然《文匯報》搞一份免費報印10萬份，真係如滄海裏面一滴汁，唔知有乜作用，左睇右睇都唔似會搞咯。

Ariel

** 博客文章文責自負,不代表本公司立場 **

佔中三子之一的朱耀明牧師接受壹傳媒《壹錘定音》專訪時透露，在一次組織者會議上，當日是學聯要求政府回應的死線，學生提出在10月2日衝擊禮賓府及堵塞花園道，促三子陪同；三子拒絕後，學生一度建議戴耀廷陪同行動。

朱牧憶述話，聽到學生要求後，當時感到很憤慨，因為佔中原本就不是要衝擊，而是希望公民抗命、坐下讓他們拘捕，不傷人命是他們最重要的原則。他強調不應拉所有人上戰場，所以喝止了衝擊行動。

壹傳媒指朱牧憶述此事時一度激動落淚。朱牧補充，自己有很大的六四陰影，運動初期見到旺角的打鬥場面，他都極力主張要撤離，因為人命攸關，不希望用暴力處理運動。

政界人士話，金鐘禁制令將於下周三執行，清場的日子漸近，人人都要為後佔中的日子作準備。有人選擇自首，有人拒絕自首，有人發聲爆料，有人選擇沉默，但各有盤算，各有動機。