戴耀廷叫人唔交稅、延交公屋租

佔中發起人戴耀廷自首完無被拘捕，帶去警署的膠樽無所用，返屋企得閒又寫稿，去美國《紐約時報》，篇文題為「What Next for Hong Kong？」（香港何去何從？），他一方面叫人結束佔領運動，另一方面又叫人唔交稅、延遲交公屋租等，都唔知呢啲行為合唔合法。

戴耀廷話，佔領運動漸漸失去民意支持，市民並非不支持真普選，而是參與者質疑長時間佔領道路的成效；加上部份示威者偏離非暴力公民抗命的本意，警方又暴力打壓，繼續佔領已成「高風險低回報」的行為。他認為雨傘運動並非一無所獲，因為運動能夠喚起年輕人一代政治覺醒，所得的已經比預期多。

他認為是時候結束佔領，重新思考新策略，走入社區，傳遞真普選的訊息，並爭取更多市民支持，透過拒絕交稅、延遲繳交公屋租金、在立法會拉布等不合作運動，堵塞政府運作，逼使政府回應訴求，比起堵塞道路來得有效。

高人話，戴耀廷呢啲書生論政，憑空想像，脫離現實，試過佔中呢一舖之後，大家好唔好再跟佢，真係要諗諗。佢叫人唔交稅，話唔交1蚊罰唔多，但萬一發動唔起幾萬人來拒交，只有幾百人唔交，人少政府就郁你啦，唔止罰款仲全部告上法庭，話呢班人有組織地拒絕交稅想嚴重「堵塞政府運作」(犯罪意圖講到明)，全部人告入，留埋案底點算? 你問戴生，佢又會話估唔到件事反應咁差，話個運動就由一個拒交稅的不合作運動，幾日內變成一個完全失敗的逃稅行動，同佢原意唔同咗，咁大家咪暈咗喺地？

當然你熱烈擁護戴生發起的行動，唔止唔交稅，仲去稅局門口抗議，意外地同稅局保安推撞起上來，戴生更加會話「我唔識你」，你唔係我運動的成員，我組織的義務律師有選擇權，佢地一定唔會幫你。

高人話，一個法律系副教授，成日教人做埋啲自己都無想清楚的犯法嘢，咁算點呢？

Ariel

** 博客文章文責自負,不代表本公司立場 **

佔中就嚟散場，忽然傳出阿爺唔滿意愛國媒體打仗打得唔夠落力的消息，話要叫《文匯報》另外出一份免費報紙。仲講到似層層，話份新免費報係小報size，每日印10萬份，主打基層讀者咁話。

Ariel搵知情人士求證一下，話聽都未聽過，唔似係真。查實9.28佔中開始之後，阿爺十分緊張，各方人馬都要動員，《文匯報》、《大公報》自然走在最前線。

《文匯報》、《大公報》過去都有少量贈閱，打仗期間，聽聞佢地同英文《中國日報》都加大贈閱數量，所以有人見到在基層公屋地區有《文匯》、《大公》派。唔知係唔係因為咁，就以為《文匯》搞免費報。

在《文匯報》前任社長張國良的年代，的確有諗過搞免費報紙，但最後被阿爺否決咗，阿爺認為愛國報紙在港有宣傳任務，搞免費報太商業化，愛國報紙無謂搞呢啲嘢出來同其他報紙競爭。

如今免費報紙比當年更多，郁吓每張都印40、50萬份，若然《文匯報》搞一份免費報印10萬份，真係如滄海裏面一滴汁，唔知有乜作用，左睇右睇都唔似會搞咯。