戴耀廷叫人唔交稅、延交公屋租

佔中發起人戴耀廷自首完無被拘捕，帶去警署的膠樽無所用，返屋企得閒又寫稿，去美國《紐約時報》，篇文題為「What Next for Hong Kong？」（香港何去何從？），他一方面叫人結束佔領運動，另一方面又叫人唔交稅、延遲交公屋租等，都唔知呢啲行為合唔合法。

戴耀廷話，佔領運動漸漸失去民意支持，市民並非不支持真普選，而是參與者質疑長時間佔領道路的成效；加上部份示威者偏離非暴力公民抗命的本意，警方又暴力打壓，繼續佔領已成「高風險低回報」的行為。他認為雨傘運動並非一無所獲，因為運動能夠喚起年輕人一代政治覺醒，所得的已經比預期多。

他認為是時候結束佔領，重新思考新策略，走入社區，傳遞真普選的訊息，並爭取更多市民支持，透過拒絕交稅、延遲繳交公屋租金、在立法會拉布等不合作運動，堵塞政府運作，逼使政府回應訴求，比起堵塞道路來得有效。

高人話，戴耀廷呢啲書生論政，憑空想像，脫離現實，試過佔中呢一舖之後，大家好唔好再跟佢，真係要諗諗。佢叫人唔交稅，話唔交1蚊罰唔多，但萬一發動唔起幾萬人來拒交，只有幾百人唔交，人少政府就郁你啦，唔止罰款仲全部告上法庭，話呢班人有組織地拒絕交稅想嚴重「堵塞政府運作」(犯罪意圖講到明)，全部人告入，留埋案底點算? 你問戴生，佢又會話估唔到件事反應咁差，話個運動就由一個拒交稅的不合作運動，幾日內變成一個完全失敗的逃稅行動，同佢原意唔同咗，咁大家咪暈咗喺地？

當然你熱烈擁護戴生發起的行動，唔止唔交稅，仲去稅局門口抗議，意外地同稅局保安推撞起上來，戴生更加會話「我唔識你」，你唔係我運動的成員，我組織的義務律師有選擇權，佢地一定唔會幫你。

高人話，一個法律系副教授，成日教人做埋啲自己都無想清楚的犯法嘢，咁算點呢？

Ariel

** 博客文章文責自負,不代表本公司立場 **

重建後嘅皇崗口岸喺2026年10月12日正式開通，實施「一地兩檢」同「合作查驗、一次放行」，仲要24小時通關，真係好方便。開通接近一個月，平日日均出入境人次已經超過86,000，比以往落馬洲管制站多咗成倍；去到週末同假期，日均更加直逼140,000人次，受歡迎程度可見一斑。

不過，人潮多咗，交通需求大增，政府就留意到有市民同旅客貪方便，搭咗啲跨境私家車往返兩地，而且當中部分係非法出租或取酬載客嘅「白牌車」。呢啲車無合法嘅出租汽車許可證，做生意屬刑事罪行。為咗保障乘客同道路使用者安全，政府近期已經明確表示高度關注，執法部門亦加強咗打擊，除咗依法檢控違例司機，仲會扣押涉事車輛。運輸署同警方亦都密密做宣傳，除咗於官方網站及社交媒體發放訊息，運輸署亦向封閉道路通行許可證持有人以及指定跨境駕駛計劃批准信持有人發出電郵，直接提醒相關車主唔好以身試法，列明違法嘅嚴重後果，同時呼籲市民要認清風險。

警方近日在新皇崗口岸拘捕一名42歲持雙程證的內地男司機，涉案豪華七人車亦被拖走扣留檢驗。

可能有人會諗：「有人肯車我，價錢啱咪得囉，做乜要搞咁多嘢？」但高人提醒，從市民自己嘅角度出發，坐「白牌車」其實係一場「搵命搏」嘅賭博，主要有兩大風險：

第一，保險隨時有機會失效，意外隨時面對索償無門。

合法嘅跨境出租車必須持有常規配額、封閉道路通行許可證同出租汽車許可證。但「白牌車」冇呢啲牌，一旦發生交通意外，提供非法服務嘅車輛，佢嘅第三者責任保險係有可能會失效。即係話，如果坐白牌車出事受傷，甚至造成傷亡，你有機會追究無門，無法獲得應有嘅賠償。為咗貪一時方便，將自己同家人嘅安全較飛，值唔值得咩？

第二，罰則極重，唔好以為只係抄牌咁簡單。

根據《道路交通條例》第374章第52(3)條，無牌載客屬刑事罪行。警方會用「放蛇」方式去蒐證，亦會喺口岸一帶同黑點加強巡邏。一旦斷正，首次定罪最高罰款港幣10,000元、監禁6個月，車牌吊銷6個月；如果再犯，最高罰款25,000元、監禁12個月，車牌吊銷12個月。涉案車輛喺吊銷牌照期間要交畀運輸署保管，司機更會被停牌最少12個月至3年。運輸署仲會撤銷埋涉事車輛嘅封閉道路通行許可證。如果涉及內地司機，警方仲會查埋係咪非法勞工或者違反逗留條件，轉交內地執法部門跟進。

其實皇崗口岸嘅交通配套正逐步完善，港九新界都有合法交通工具直達，包括7條專營巴士（6條日間、1條通宵）、3條日間同3條通宵專線小巴、5條短途跨境巴士同長途跨境巴士，仲有市區的士、新界的士同車隧的士。

高人話，政府打擊「白牌車」，並唔係要阻礙大家出行，而係要守住安全底線，同時可令皇崗口岸更暢順。對市民來講，搭合法交通工具先可以保障自己同屋企人。