政事
大家唔知記唔記得，在佔中開始之前，網上媒體《主場新聞》突然執咗笠，《主場新聞》的大股東蔡東豪出咗篇文講件事，但就無公開露面解釋事件。
當時市場好多傳聞，其中一項係唔會唔阿爺出手，挾佢唔玩《主場新聞》，因為蔡東豪正職係上市公司精電CEO，精電在內地有廠，精電又有生意同內地人有合作，大家靠估話佢為保住精電份工，情願棄車保帥，唔玩《主場新聞》。
不過佔中佔到近尾聲之際，精電公布，蔡東豪因私人事務，將辭任公司之執行董事、行政總裁及授權代表；高頴欣將獲委任為公司行政總裁及授權代表，明年3月31日起生效。蔡東豪連精電都唔玩，之前傳聞的「棄車保帥」理論好似又唔係幾成立。
睇番精電披露，東豪哥舊年有1066萬年薪，都係一份筍工。唔知佢兩樣都唔做，係唔係有大茶飯諗住去食呢? N年前傳過壹傳媒搵佢做CEO，不過大家傾唔掂，而家雙方唔知仲有無偈傾呢?
Ariel
** 博客文章文責自負,不代表本公司立場 **
警方預先公布明早會在金鐘清障，但學聯和學民思潮昨晚仍然呼籲，曾經參與公民抗命的人，明早到金鐘佔領區，以示願意承擔刑責咁話。
雙學話，會恪守非暴力原則，至於屆時會「手挽手」躺在地上讓警方抬走，抑或在前線與警方抗衡，由佔領人士自行決定。
高人話，雙學到呢個階段，仍然叫人去金鐘，有少少不負責任。若然他們真的叫人去「顯示願意承擔刑責」，應該佢去金鐘的人不反抗任由警方抬走，但他們又說由示威者自己決定，難免令人認為佢地仲係想拉馬，希望有好多人去金鐘頂住，希望政府清唔到場。
雙學話「會恪守非暴力原則」，但又唔叫人不反抗，就充滿咗佢地成日批評特首玩「語言偽術」色彩，令人感嘆。
政府明早能否順利清場，示威者人數多少十分關鍵。對上一個星期日雙學拖馬叫人圍政總，最高峰只有4000人出席集會，也不是所有人去包圍，半夜佔龍和道只有幾百人，所以警方成功清場。明日是上班上學時間，理論上更難召集人去示威，若在場人數不足1000人，成功清場的機會較大，若有幾千人在場，又激烈對抗，都唔係咁易清。
