自由黨同阿PAUL愈行愈近乎？

佔中、清場在政壇炒到熱一熱，社會上分成兩批撕裂晒，立法會內亦唔走得甩，泛民發聲明，建制派又會齊齊出來發聲明，好似昨日建制派議員一齊開記者會，要求當局依法追究違法佔領人士，包括發動行動人士。但好似又唔覺自由黨有代表出席建制派的活動，自由黨都幾特立獨行喎。

之前前黨主席田大少就走去見當時絕緊食的學民思潮黃之鋒等人，仲答應向CY轉達會面要求，真係遊走兩面，八面玲瓏咁話。唔止田少，當日一齊去探黃之鋒的仲有「西環契仔」之稱的謝偉俊阿Paul。早前政壇已有傳聞，自由黨覺得阿Paul同傳統建制唔多同，好想拉佢入黨。

據聞阿Paul就心大心細，不過，一啲舉動就似乎同自由黨行得好埋，交通運輸界因為佔領運動，大呻影響收入，旺角同金鐘都分別由運輸界出頭入稟申請禁制令，結果就變相搭橋俾政府有咗清場開通道路的機會，但自由黨的易志明身為交通航運界立法會代表，全程唔多覺佢好高調撐業界要求通路，到今日清金鐘時，先至俾人見到佢同冠忠董事長一齊出現在現場。

同自由黨關係幾好的阿Paul，就作為冠忠的法律代表協助申請臨時禁制令，唔知係咪自由黨搭路呢，咁都算向業界有交待啦，又唔使令人覺得太高調參與反佔中俾人鬧，又有個角色做咗啲嘢。睇吓潮聯在旺角入稟成功清障後日日俾人圍，有時做出頭鳥都要承擔風險架。之但係，依家社會咁撕裂，阿爺未必再需要兩面派，打起仗嚟就好難面面俱圖，唔係吓吓都可以又要威又要戴頭盔喎。

Ariel

** 博客文章文責自負,不代表本公司立場 **

警方呢次清場有周密部署，其中一招是事前拉晒幾個激進組織的負責人，顯然是阻止他們動員人馬到金鐘反抗。

「熱血公民」負責人黃洋達在其個人社交網站專頁表示，他下午在住所樓下被警方拘捕，被控參與59宗非法集結，被帶往深水埗警署。

曾主張「以武制暴」的學生組織「學生前線」在社交網站專頁透露，化名「四眼哥哥」的核心成員鄭錦滿，早上被警方上門拘捕。另外社民連副主席黃浩銘亦被被捕，長毛批評是白色恐怖及打心理戰，令更少市民參與佔領。人民力量立法會議員陳志全的助理蘇浩亦被捕，陳志全話，警方在清晨時份突然到蘇浩寓所拘捕他。

警方拘捕過往佔領時激烈對抗的示威者或組織，顯然是想減少金鐘清場時的對抗，不想激進組織發動人員去金鐘和警方對著幹。