佔中、清場在政壇炒到熱一熱,社會上分成兩批撕裂晒,立法會內亦唔走得甩,泛民發聲明,建制派又會齊齊出來發聲明,好似昨日建制派議員一齊開記者會,要求當局依法追究違法佔領人士,包括發動行動人士。但好似又唔覺自由黨有代表出席建制派的活動,自由黨都幾特立獨行喎。
之前前黨主席田大少就走去見當時絕緊食的學民思潮黃之鋒等人,仲答應向CY轉達會面要求,真係遊走兩面,八面玲瓏咁話。唔止田少,當日一齊去探黃之鋒的仲有「西環契仔」之稱的謝偉俊阿Paul。早前政壇已有傳聞,自由黨覺得阿Paul同傳統建制唔多同,好想拉佢入黨。
據聞阿Paul就心大心細,不過,一啲舉動就似乎同自由黨行得好埋,交通運輸界因為佔領運動,大呻影響收入,旺角同金鐘都分別由運輸界出頭入稟申請禁制令,結果就變相搭橋俾政府有咗清場開通道路的機會,但自由黨的易志明身為交通航運界立法會代表,全程唔多覺佢好高調撐業界要求通路,到今日清金鐘時,先至俾人見到佢同冠忠董事長一齊出現在現場。
同自由黨關係幾好的阿Paul,就作為冠忠的法律代表協助申請臨時禁制令,唔知係咪自由黨搭路呢,咁都算向業界有交待啦,又唔使令人覺得太高調參與反佔中俾人鬧,又有個角色做咗啲嘢。睇吓潮聯在旺角入稟成功清障後日日俾人圍,有時做出頭鳥都要承擔風險架。之但係,依家社會咁撕裂,阿爺未必再需要兩面派,打起仗嚟就好難面面俱圖,唔係吓吓都可以又要威又要戴頭盔喎。
Ariel
** 博客文章文責自負,不代表本公司立場 **