毛姑姑:我要男警！

十幾個泛民去金鐘示威區等拉，當中都有少少趣事。

  

首先係民主黨主席卿姐，被拉之後，去到警車前循例都要登記證件，唔知唔係咪搵唔到身分證，見佢在袋度抄完又抄，要勞煩兩位女警一齊幫卿姐搵，好彩搵到，唔係咪告多條罪。

 

輪到「民主女神」余若薇 ，保持一貫的優雅，兩位女警扶佢起身後，佢撥一撥頭髮先，一路保持微笑，同卿姐唔同，一路行並無叫口號。

至於另一名公民黨成員，毛孟靜就仲頂癮，佢好多口號要叫，叫完口號，差人想拉之際，佢話想嗌埋英文口號(認真照顧英文台觀眾)。咁仲唔止，到差人拉佢時，佢話:「我年紀大，要你哋扶我起身」當兩名女警上前扶佢時，竟然話：「我要男警得唔得呀？！」

(毛孟靜等泛民人士被帶走的影片：)

  

呢句聽到人眼都突，女人俾人拉搵女警就唔奇，搵男警就奇怪少少喎。我估毛姑姑可能怕女警唔夠力跌佢，所以搵男警，但言者無心，聽者嚇親。

Ariel

** 博客文章文責自負,不代表本公司立場 **

警方今日在金鐘佔領區清場，壹傳媒集團主席黎智英和多名泛民立法會議員一起被拉。肥佬黎在下午5:27分左右被捕，《蘋果日報》在5:46分已刊發消息，話黎智英辭任《蘋果日報》社長一職，該職位會由壹傳媒平面媒體行政總裁葉一堅兼任。

肥佬黎此行動惹起政界議論紛紛，政界中人話，肥佬黎的政治立場一向鮮明，不單是參與佔中，簡直就是核心份子，但一直沒有辭任《蘋果日報》社長的職位，但到佔中快將結束，他被捕之後，就馬上辭任社長職位，難道是怕《蘋果日報》被封?

Ariel話唔係咁誇啩，封報紙？有報壇老人家就話，在1967年4月香港人造膠花廠勞資糾紛，引發「67暴動」，結果死咗50人，拉咗5000人，封咗三份報紙，包括《香港夜報》、《田豐日報》、《新午報》這三家「非正統左報的左報」，於8月9日被港英政府下令停刊。而家呢啲停報紙的舊例，仲仍然存在架，所以肥佬黎擔心都有理由呀。

要注意肥佬黎只係辭《蘋果日報》社長，無辭上市公司壹傳媒的主席職位，睇嚟真係驚影響報紙多啲。

佔中前「壹傳媒股民」爆肥佬黎秘聞，其中爆出一封葉一堅與肥佬黎的電郵，人稱「堅哥」的葉一堅，知道肥佬黎找人製作佔中教戰動畫，他覺得黎智英及壹傳媒參論與其事，不甚妥當，於是建議壹傳媒與肥佬黎都不要在這方面提供幫助。肥佬黎當然係啋堅哥都有味。

後來佔中爆發，肥佬黎唔止整吓動畫咁簡單，出錢出力，仲站埋出台前。如今回想，堅哥當日的提醒，真係有先見之明噃。