中間路線如何有出路？

報業公會六十周年舉行酒會，唐唐都有出席，佢話好不幸佔中令社會好撕裂，兩方面意見都好強，希望可以彌合到兩種意見啦，暫時睇都有啲困難，好似自由黨呢啲中間啲的政黨，依家比較難有市場，遲啲希望可以好一些。

佢又話希望自由黨同經民聯可以合併，但睇嚟暫時做唔到。

唐唐冇佢老友田少咁樂觀喎，田少接受星島日報訪問時就話，自由黨向來支持功能組別與地區直選同時參與，要面向全港選民，認為今次政改波瀾後，自由黨的中間路線更廣闊。田少話佔中後，不少本身是專業的中產，不滿公民黨知法犯法；新民黨葉劉因是行會成員及要參選特首，又變了「超級梁粉」，佢相信若今天就是投票日，自由黨的勝算大增，只是兩年後真的選舉時，不知選民取向。

 

田少又話CY若要改善管治，就應主動與泛民改善關係，否則難以實現他的鴻圖大計。他又認為，若政府選擇以強硬手段對付泛民，香港只會更不和諧，商界更難做生意。

政壇高人就覺得，田少的想法同現實可能有啲距離，香港研究協會在清場前做咗個民調，訪問咗1112人，15個擁有立法會議席的政團支持度評分幾乎全線下跌，泛民政黨都算跌得幾慘烈，其中街工同職工盟跌得最勁，似乎應驗咗佔中運動愈激烈，泛民政團真係要找數。建制派方面，自由黨、經民聯同工聯會都下跌，反而喺佔中期間比較鮮明反佔中的民建聯同新民黨支持度評分有輕微上升。

呢個結果都幾有趣，對各政團應該有啲啟示啩，由結果來睇，田少話的中間路線似乎唔係咁易喎。

Ariel

** 博客文章文責自負,不代表本公司立場 **

佔領最後據點銅鑼灣尋日清場，算係暫時落幕，就輪到政府推出多項民生政策文件。清場唔夠48小時，已有數項關乎民生政策出台。特首CY喺行會亦話，處理政改同佔領之餘，亦要不遺餘力搞好經濟同民生。

昨日銅鑼灣馬路中午一開通，食物及衛生局局長高永文下午就開記招，公布自願醫保文件。醫保傾咗多年，好鬼複雜，未必一時三刻睇得明，但同大家健康同荷包有關，真係要好好關心吓。

點知朝早瞓醒報紙都未睇得切，行會就通過咗兩電出年的加電費決定，今次加的幅度唔算高，港島電費一向貴啲的港燈仲凍結唔加添，呢啲民生事務，加幾多好多市民關心，今次的結果聽落都唔會引起太大反感。

呢頭食飽飯，張炳良又拖埋副手出嚟，公布長遠房屋策略，話要增建房屋，未來10年，每年額外增加1000個單位供應，全數係做出售資助房屋。似乎回應社會上，尤其係年青人對現時樓價高企、無從安居的不滿。

睇嚟踏入後佔中，政府急急推出多項政策同諮詢，希望在民生事務事上攞番啲分，都算係撫平傷口的其中一招。CY今早仲預告埋，已經收到獨立專家小組有關高鐵工程報告，睇怕嚟緊，政府仲有大把嘢要公布囉！