雖然表面局勢及邏輯上，美國以油價對付俄國，有講得通道理之處，但太複雜，影響亦唔應該係咁表面睇一箭雙鵰（低油價減削俄國能源出口收入，同時減低美國生產成本）。袋鼠就唔係睇得咁複雜，最簡單睇係美國政府係希望有穩定能源供應，減少中東局勢對佢經濟嘅影響，從而可以將戰略軍事力量轉移到遠東、太平洋地區。
有高油價支持，到佢哋去開採國內嘅頁岩氣，而且同時亦支持到加拿大嘅提鍊油砂；但係袋鼠一、兩年前講頁岩氣(及油砂)都應該提過，呢啲石油替代能源，要有番咁上吓油價支持才可行；當時盛行歌頌頁岩氣帶動美國經濟復甦，但係袋鼠指油價下跌去刺激經濟增長會有個譜；而家情況係， 既然見到供應增加油價下跌已成趨勢，長痛不如短痛，石油出口國組織，尤其是當中成本最低嘅產量大國（舊數據，但應該係講緊每桶十蛟成本咁上下），索性幫手加速油價崩盤，直到重獲油價主導權。
老實講，啲高成本石油生產國，多數係不同形式獨裁統治國，同美國過去幾年舉債開拓頁岩氣田嘅公司比較，袋鼠會買啲獨裁國家會襟捱好多囉！
而家利息低，但啲開採公司賣出產品時，市價賣一桶蝕一桶，呵呵，到時會唔會在垃圾債市來一個人踩人，踩出一隻黑天鵝蛋？要知道油價見低，大慨要睇到有這個情況嘅一日。
大笨袋鼠
** 博客文章文責自負,不代表本公司立場 **
啲人究竟仲記唔記得，一年多之前，評論開採頁岩氣，除了將美國由能源剩進口國轉為剩出口國，更係被稱之為帶動美國經濟復甦的火車頭。當時作出結論基礎，就算以係最保守假設，大慨亦沒有預算到每桶50-60美元的油價。
而家不少集中於油價分析，主要看供應方面，深入一點的，會提及能源生產國之間以價格進行的博奕。然而，經濟需求不一定可以受油價刺激之外 - 君不見同樣降低經營成本的利率下跌、多年來多國進行量化寬鬆，(沒有政府開支配合) 亦不見得對經濟起色有特別大的幫助吧？
這是因為經濟實體，依然沒有本身的信心去擴張！多年來袋鼠提及，聯儲局在量寬時期，增長最大的只是以萬億計的excess reserve結餘，表示這些錢不曾流到實體經濟。
以能源生產比喻，也許其中一個相似情況，就是國家戰略石油儲備會增加。此外，石油作為一種商品來看，除了頁岩氣，許多要高油價才有利可圖的替代能源、再生能源產業，亦有企業倒閉潮之可能性。
雖然在已發展國家之中，經濟產業成份，是以服務業、第三產業為主，一般超越七成比例，當中不少但一般如開採資源的初級產業，除了增加國民收入之餘，加上消費的成數效應倍大，對推動增長經濟，可以是十分重大；過去十多年澳洲經濟的加速增長，與及近兩年跟隨資源價格下跌而有所放媛，可見一斑。
說回頁岩氣業，傳統智慧是能源成本低有助經濟增長，但也許不能一本通書睇到老。當前最主要留意，美國的頁岩氣業，是否會出現裁員、公司倒閉，由個人、公司以 致政府收入都減少的情況低下，經濟消費乘數效應亦將跌幅倍大，加上其他既有行業未有起色之前，當一些高成本產油國，在低油價死埋一邊時，美國經濟亦有要陪葬呢？
