政事
經常拖糧的亞洲大電視拖到夥記火滾，聲言再唔出糧就停工，好似逼出少少成果，而家話24號聖誕前夕有糧出。
一直傳話亞視新聞部做完下周一6點晚間新聞，若無糧出就停工。因為出新聞是電視台發牌條件之一，若然無人做新聞，違反發牌條件，個台都可以玩完啦。
不過聽聞亞視新聞部無話罷工或者有工業行動，員方的行動其實係咁，下周一會叫勞工處派人上亞視，同員工講解申請破產欠薪保障基金的細節，同員工做埋登記。然後亞視新聞部員工做完當晚6點晚間新聞後，就發新聞稿，話基於新聞專業精神，會做到31號，到時若無糧出先至停工。
不過今晚亞視新聞部高層同員工講，收到管理層消息，24號聖誕前夕有糧出。大家暫時只係信住一半先，希望承諾可以兌現，讓大家開開心心過聖誕啦。不過，只係講緊出番十一月的糧，來緊又到出十二月糧的日子囉喎，唔知有著落未啦。
Ariel
** 博客文章文責自負,不代表本公司立場 **
新地案許仕仁、郭炳江四個被告中晒，只有郭炳聯脫罪，佢雖然無事，聞判時都眼泛淚光 並用紙巾擦眼淚。宣判後郭炳聯離開高院大樓5樓法庭後，走樓梯到4樓會議室坐下，雙手抱頭。在會議室內一度除下眼鏡拭淚，然後和代表律師研究陪審員裁決比數的清單表。
呢單嘢佢二佬郭炳江中咗一條串謀公職人員行為失當罪，話佢串謀許仕仁擔任政務司司長時優待新地，以換取850萬元。條罪唔輕，依家郭炳江要還柙，就算保釋出來都做唔到董事。
新地官司由家族糾紛開始，大佬郭炳湘同兩個細佬鬧意見，後來阿媽支持兩個細路，趕咗大佬出新地管理層，有人好不滿走咗去廉記投訴，鬧出呢單大案。
如今二佬入冊，三弟炳聯大難不死，必有後福，未來新地大業，勢將由他掌舵。世事好難講，估唔到結局係咁。鬥到咁，成個家族都好幾傷。
想當年老爸郭得勝在生時，決定不分家，唔希望死後拆散新鴻基，才叫三兄弟共同管理。估唔到當日唔分家，會種下今天的惡果。
