政事
新地案終於落幕，許仕仁被判入獄7年半，相當慘情。
許仕仁律師話，許因為怕凍，要求懲教處共提供了9張被，但他冚被後仍然雙手雙腳冰冷，不能入睡。
人人都知老許身子弱，佢係有錢仔出身，身子唔壯，非常怕冷，大熱天時都著棉衲，而家仲要日日食中藥。入咗獄無暖氣，床又凍，自然係蓋9張被都頂唔順。
不過法官麥機智判佢入獄7年半，其實都判得較輕。法官在判刑時對許的評價幾高，形容若非本案，他已成為歷史上本港近年最好的政務司司長，但他為咗維持高尚生活而犯案，令許的歷史蒙上陰影。
麥官指許仕仁05年出任政務司司長，大家都知道佢係有謀略、有能力的人，在香港艱難時期上任，備受尊重。量刑時考慮到許仕仁過往在政府努力工作、對香港有極大貢獻，特別是前特首曾蔭權為佢求情，以及許98年在香港貨幣市場「打大鱷」，品格一直良好及成就大，因此扣減部分刑期，所以都算判得輕。
7年半刑期對老許嚟講都好難挨啦，上訴亦都唔知走唔走得甩。
Ariel
** 博客文章文責自負,不代表本公司立場 **
亞視員工認真慘慘慘！一年做到晚，以為到冬至都可以食啖安樂茶飯，本來傳出24號可以出番上個月(十一月份)糧，但今日執行董事葉家寶就話，聖誕節前都未必出到糧。
葉家寶見記者的講話中最新訊息係，王征認為過去盛家已投入20億支持亞視，可謂已經對亞視完成歷史使命，點都唔會再攞錢出糧。即係唔會再托水救亞視啦，王征唔托水，亞視面臨倒閉。
據悉，王征的策略好可能係「玩清盤」。估計王征去到咁盡，有兩個可能，一係佢假設阿爺同政府唔想亞視死，一定會救，而事實上一直都有人有意買亞視，只係王征叫價太高，嚇走咗有意者。王征同政府玩鬥大，睇吓最後邊個屈服，你幫我搵人買。
另一個可能王征去到咁盡，預咗清盤都無所謂，一直以來，佢都係以債權人身份入主亞視，萬一走上清盤呢條路，無論邊個白武士都好，都要先還錢俾債權人，所以征哥雖騎呢，但都有佢條數。
不過，要走上清盤呢條路，就會出現變數，第一係咪一定找到白武士呢？第二白武士願意俾幾多錢買亞視呢？到時清盤人會作出獨立研判，點樣係最佳方案就會用果個方案，有爭拗就攞到法庭去訟裁添，未必清盤王征就一定攞到最大利益。
知情人士話，王征的做法充滿內地人的思維，佢唔知香港係法治社會，搞到清盤去到法庭，就要聽法官講。
無論股東邊個啱邊個唔啱，最慘都係打工仔，學亞視新聞部的聲明話齋，剛剛完成79日的佔領活動採訪，當值時間超晒鐘，依家仲搞到過節無糧出，征哥的「良心電視台」口號，聽落就有啲諷刺啦。
