之鋒評泛民大佬引關注

佔領運動告一段落，呢個聖誕假期，政壇整體都算平靜。「學民思潮」召集人黃之鋒早前接受前社民連主席陶君行的網台訪問，在「大君伐」節目中暢談佔領運動總結，點咗好多泛民大佬的名，當中表達咗唔少不滿，搞到政壇中人都幾關注吓。

佔中後期，雙學(學聯和學民思潮)經常同泛民開會，之鋒話覺得泛民議員有舖發言癮，當正在立法會開會咁，為講嘢而講嘢，有人想控制雙學:「佢哋想指點，但指點唔到囉！」佢又講吓對泛民大佬的印象，話民主黨的何俊仁個樣容易被人嘲諷，但都算係易溝通的Uncle；至於民主黨主席劉慧卿，就好少喺佔領期間參與開會。

之鋒又話，好彩泛民飯盒會在佔領運動時剛好換咗召集人，唔係之前的召集人馮檢基，形容佢在9.28警察放催淚彈時，喊到豬頭咁；至於呢期飯盒會召集人梁家傑，相對嚟講可以溝通，起碼開會時唔係為發言而發言；被視為激進啲的毓民，之鋒話好少見到佢，唔覺得佢係泛民主派，佢話毓民只係時事評論員，同埋足球評論員比較多，話對毓民無乜期望，所以無失望。

之鋒係咁話泛民大佬們，言語之間都聽得出，同佢地唔係咁「和諧」啦。其實泛民在佔領運動中段，都覺得佔領運動會拖累泛民，成為泛民的政治負資產，力谷雙學撤退，那段時間，雙學同泛民的矛盾已經浮現，特別係學民思潮，因為相對學聯，學民仲激一啲，最後佔領退場，泛民大佬們又走晒出來坐喺度被拉。

睇嚟之鋒對泛民的表現都唔係好順，所以依家走出來力數泛民政客一番，不單對佢哋不滿，亦有可能藉此延續自身的政治能量噃。

Ariel

** 博客文章文責自負,不代表本公司立場 **

特首CY上京述職後，政府最快在1月推出第二階段政改諮詢，政制及內地事務局副局長劉江華話，佔領運動之後，推動政改難上加難。高人話呢個已經係官樣文章的講法，實際上係極難。

阿爺對政改立場強硬，8.31人大常委會決定無得改，CY未上京都好清楚。他上京見習大大那一場，習大大講得再白啲，提到香港政制發制，第一最重要的是依法推進，等如話所有佔中式推進都係非法，逼唔到我。第二提到應該有利於居民的安居樂業，有利於香港社會的繁榮穩定。即是話政改要有利於香港民生經濟，如果搞得太急對民生經濟不利，不要硬搞。

中央雖然仍然表露一個想搞普選的基本態度，但佔中之後亦不怕多講其他顧慮，等如話不是事必要搞。

高人話，特首也好，高官也好，公開講一定講到政改仲有機會通過。但佔中之後，泛民態度更僵化，而阿爺態度就更強硬，雙方走遠咗好多，即使CY仲想政改過，都無乜辦法拉雙方在一起。暫時睇，政改通過不是難，是極難。