大輝入自由黨玩直選

中華廠商聯合會今晚舉行就職典禮，之前改選會長都幾多新聞走出來，李秀恒爆冷勝出，林大輝又唔做會董。依家大輝係工業界代表進入立法會，係廠商會條線入會，唔做會董，即係下屆要入立法會都唔會走呢條路啦。

聞說大輝準備入自由黨，只是搵個吉時公布。廠商會中有人對大輝在立法會的言行有意見，早已不是秘密，佢都心中有數。大輝2016年唔會再選廠商會的功能組別，要爭番立法會的議席，轉玩直選是唯一出路。據聞自由黨開出條件，重點資源會放喺新界東，幫佢全力爭新界東出線。

因為言論出咗位被搣政協柴的田大少繼續出位，在facebook發文，批評政府的「民情報告」無提到「特首管治問題」，亦無提到泛民議員在議會內的不合作運動，更無提及因為梁振英與泛民及學生溝通出現問題，引發79日的佔領行動：「咁你向中央政府報告咗啲乜？」田大少咁講似乎想爭取不滿政府者支持，睇嚟佢都會繼續出吓位，想將來過票俾大輝。

自由黨領導已改選，大輝入黨後，都唔會馬上做到最高領導，反而集中精力，部署在明年出戰直選。

Ariel

** 博客文章文責自負,不代表本公司立場 **

阿爺守硬人大8.31框架，特區政府無乜銀兩游說泛民轉軚，袋中無錢，就問人借錢，昨日就借了陳弘毅教授的「白票守尾門」方案來推銷。

林鄭月娥在立法會回應議員提問時，被問到「白票守尾門」方案，話政府會「認真考慮」。到政制及內地事務局局長譚志源在記者會講嘢時，就玩得更白，話「其實最早提出白票守尾門唔係陳弘毅教授，最早提出乃係民主黨羅致光先生，後來報紙社評都有跟進。」

記者見佢話民主黨羅致光提出呢個方案，就問佢會否向民主黨及泛民釋出善意爭取支持？譚志源就未敢講太多，只係遊吓花園就算，但表示已收到陳弘毅的詳盡意見書，三人組會與他見面，詳細研究法律上和運作上的細節，並會同時研究立法會和區議會的白票安排，再作定論咁話。

高人話阿爺根本唔接受白票守尾門呢種方案，但特區官員根本無乜大嘢可以和泛民討價還價，就連白票守尾門方案都借來用用，頗有點借錢去賭的味道，得唔得就見仁見智啦。